Astananyń ortalyq dańǵylynda Úrmeli aspaptar orkestriniń sherýi ótedi
ASTANA. 6 maýsym. QazAqparat - Astana qalasynyń turǵyndary men qonaqtary jýyrda dabyl men trýbanyń myqty ári áýezdi dybysymen árlengen biregeı dýmannyń kýási bolmaq. Astana kúni qarsańynda «Astana samaly» atty úrmeli aspaptar orkestrleriniń halyqaralyq festıvali ótedi, dep habarlady astana.kz.
Úrmeli aspaptar orkestriniń áýenderi tyńdaǵan jannyń qulaq quryshyn qandyryp, kóńil kúıin kóteredi ári merekeniń ajaryn asha túsedi.
Bıylǵy tartý tym erekshe. Orkestrler Astananyń ashyq alańdary men ortalyq kóshelerin saltantty túrde júrip ótpek. Merekelik sherýdegi kontserttik baǵdarlama naǵyz sazdy-áýendi dýmanǵa aınalyp, kópshiliktiń kóńilin kótereri sózsiz.
«Astana samaly» festıvalinde Qazaqstannyń úrmeli aspaptar orkestrlerinen ózge «Mehter» Túrkııa áskerı-etnıkalyq úrmeli aspaptar orkestri, sondaı-aq alys-jaqyn shetelderden kelgen orkestrler óner kórsetedi dep kútilýde.
«Úrmeli aspaptar orkestri festıvali - qalamyzdyń mádenı ómirindegi jarqyn ári biregeı shara. Festıvaldiń basty maqsaty - orkestrlerdiń áýezdi shyǵarmalary arqyly tyńdarmandardy qaıtalanbas shynaıy áserge bóleý», - delingen habarlamada.
