Astananyń óner súıer qaýymy Farızanyń jyr-álemimen qaıta qaýyshty
Belgili teatr ártisteri aqynnyń óleńderin naqyshyna keltirip oqydy. Kompozıtorlar Eskendir men Birjan Hasanǵalıevter, tanymal ánshiler Nurlan Ónerbaev, Aıgúl Qosanova, Meırambek Besbaev, Jubanysh Jeksenuly, sondaı-aq «Muzart» toby men «Ańsar» trıosy aqynnyń sózine jazylǵan ánderdi shyrqady.
Osy keshte kórermender beınetaspaǵa jazylyp alynǵan Farıza Ońǵarsynovanyń ózi oqyǵan óleńi men aqynnyń baqyt týraly aıtqan oı-tolǵamdaryn tyńdaý múmkindigine ıe boldy.
Aıta ketý kerek, F.Ońǵarsynova 1939 jyldyń 25 jeltoqsanynda qazirgi Atyraý oblysynyń Isataı aýdanyna qarasty Manash aýylynda dúnıege kelgen bolatyn. 2014 jyly 23 qańtarda dúnıeden ozdy.
Halqymyzdyń ardaqty aqyny, qoǵam qaıratkeri Farıza Ońǵarsynovanyń búkil sanaly ǵumyry óz halqyna qyzmet etýge arnalǵan edi. Onyń ultjandylyq, adaldyq pen tektilik, náziktik pen bekzattyq sııaqty asyl qasıetteri jalyndy da jaýhar jyrlarynan kórinis tapqany anyq. Sol arqyly ol barsha qazaqtyń júregine jol tapty. Farıza óleńderi halqymyzdyń máńgilik sarqylmas rýhanı qazynasy retinde qazaq poezııasynyń altyn qoryna endi.
Aqyn jyrlary qazaq halqymen birge máńgilikke jalǵasa bermek. Elimizdiń súıikti aqynynyń shyǵarmashylyǵyna arnalǵan kesh - sonyń aıqyn dáleli.