Astananyń oqý oryndarynda temeki tartý men esirtki zattaryn qoldanýdy anyqtaý maqsatynda reıd ótkizildi
ASTANA. 24 aqpan. QazAqparat - Astana qalalyq ІІD qyzmetkerleri «Nur Otan» HDP, eriktiler jáne temekige qarsy koalıtsııa múshelerimen birigip oqý ordalarynda temeki tartý faktileri men esirtki zattaryn qoldanýdy anyqtaý maqsatynda reıd júrgizdi.
Bul týraly qalalyq ІІD-den málim etti.
Іs-shara barysynda bir kúnde qala mektepterinde shylym shegý boıynsha 30 fakti tirkeldi. Elordalyq saqshylar oqý oryndarynyń dálizderi men dárethanalaryna kirip, oqý úzilisi ýaqytynda temeki býdaqtatyp turǵan birneshe jasóspirimniń ústinen tústi. Jas órendermen profılaktıkalyq áńgime júrgizilip, hattama toltyryldy. Esirtkige qatysty birde-bir fakti anyqtalǵan joq.
2010 jylǵy 9 qazanda qabyldanǵan «Halyqtyń densaýlyǵy jáne densaýlyq saqtaý júıesi» týraly Qazaqstan Kodeksine sáıkes, qoǵamdyq oryndarda, solardyń ishinde mektep qabyrǵalarynda, densaýlyq saqtaý mekemeleri, murajaı, qoǵamdyq tamaqtaný oryndary, kınoteatrlar, tsırk, sporttyq zaldarda temeki tartýǵa tyıym salyndy.
ІІD-den habarlaǵandaı, jyl bastalǵaly elordada Kodeks talaptarynyń oryndalýyna 124 tekseris júrgizilip, 224 ákimshilik quqyqbuzýshylyq anyqtaldy. Ákimshilik kodekske sáıkes, zańdy buzǵany úshin jeke tulǵalar 1 aılyq eseptik kórsetkish kóleminde, eger áreketin qaıtalaǵan jaǵdaıda 2-den 5 aılyq eseptik kórsetkishke deıin aıyppul tóleıdi. Al zań talaptary jumys berýshi tarapynan buzylatyn bolsa 40 aılyq eseptik kórsetkishke deıin aıyppulmen jazalanady.
