Astananyń «Nurjol» býlvaryndaǵy kólik ornynyń aqysyn onlaın tóleýge bolady
ASTANA. QazAqparat - Astanada «Nurjol» býlvarynda kólik qoıatyn orynnyń aqysyn onlaın tóleýge bolady, dep habarlaıdy QazAqparat tilshisi «Astana turaq keńistigi» JShS baspasóz qyzmetine silteme jasap.
Baspasóz qyzmetinen habarlaǵandaı, ol úshin «Senim» arnaıy qosymshasyn júktep alyp, tirkelip, kólik týraly derekti engizý qajet jáne ballansty toltyryp, tóleý qajet.
Eske salaıyq, «Nur jol» býlvarynda aqyly kólik turaqtary 15 qańtardan bastap jumys isteýde.
Atalǵan aýmaqta 472 turaq orny jabdyqtalǵan. Jol belgisi qoıylyp, aqparattyq taqtalar men 12 parkomat ornatylǵan.
Turaqtyń bir saǵatqa quny tańǵy saǵat 8-den keshki 8-ge deıin - 100 teńge. Tólemdi kólikti turaqqa qoıǵan sátten bastap alǵashqy 30 mınýt ishinde jasaý qajet. Demalys jáne mereke kúnderi tólem alynbaıdy. Tolyq aqparatty www.2888.kz saıtynan alýǵa bolady. Bul saıtta kún saıyn turaqtyń aqysyn tólemegen adamdardyń deregi jańartylyp otyrady.
Kólikti turaqqa Ekinshi dúnıejúzilik soǵystyń ardagerleri, birinshi jáne ekinshi top múgedekteri, «Altyn Qyran» jáne «Halyq qaharmany» ordenderiniń ıegerleri, kóp balaly analar, «Altyn Alqa» jáne «Kúmis Alqa» ıegerleri, Semeı ıadrolyq polıgonynda zardap shekkender, Aýǵan soǵysynyń ardagerleri tegin qoıa alady.
