Astananyń Nura aýdany qalaı abattandyrylady

ASTANA. QazAqparat – Astana qalasy ýrbanıstıka ortalyǵynyń basshysy Erlan Bazyken taıaýda qurylǵan elordadaǵy Nura aýdanyn qalaı abattandyratynyn aıtty, dep habarlaıdy QazAqparat tilshisi.

«Búgin 2035 jylǵa deıingi Bas jospardyń qorytyndy talqylaýy ótýde. Onyń sheńberinde búkil qalany abattandyrý jáne kógaldandyrý boıynsha josparlar qurylady. Turannyń batys bóliginde ornalasqan Nura jańa aýdanyna keletin bolsaq, onda jalpy jospar qabyldandy, ol oryndaý kezeńderine bólindi. Qazirdiń ózinde Jaǵalaý, SAT CITY jáne adamdar turatyn basqa aýmaqtar bar. Tıisinshe, birinshi kezeńde qoǵamdyq keńistikterdi, aýla aýmaqtaryn abattandyrý, kóshelerdi kógaldandyrý jumystary júredi», - dedi Erlan Bazyken.

Onyń aıtýynsha, Úlken Taldykól aýdanynda rekreatsııalyq aımaq ornalasady. Al Kishi Taldykól mańynda kólemi 150 gektardan asatyn ekopark qurylady.

«Kógaldandyrýǵa, abattandyrýǵa, jaıaý júrginshilerge arnalǵan ınfraqurylymǵa basa nazar aýdarylady. Sonymen qatar, osy ýchaskelerde bolatyn bıoártúrlilikti saqtaý mańyzdy. Sondyqtan munda tabıǵı saıabaq bolady. Bizge jaıaý serýendep, faýna men bıoártúrlilikti kórýge bolatyn tabıǵı saıabaq kóbirek kerek», - dep túıindedi Erlan Bazyken.

Aıta keteıik, búgin elordada qala turǵyndarymen birlesip, shahardyń Bas josparyn talqylaý ótip jatyr.