Astananyń negizgi joldarynda jańartý jumystary júrgiziledi
ASTANA. 12 shilde. QazAqparat - Bıylǵy 14 shildeden bastap elordanyń mańyzdy kólik joldarynyń bólikterinde jańartý jumystary bastalady.
Bul týraly búgin Astanada ótken baspasóz máslıhatynda qalalyq Jolaýshylar kóligi jáne avtomobıl joldary basqarmasynyń bastyǵy Rashıd Amanjolov málim etti.
Atap aıtqanda, osy jumystardyń aıasynda Beıbitshilik kóshesi, Á. Moldaǵulova kóshesi, Mırzoıan kóshesi jáne salynyp jatqan opera jáne balet teatryna Qonaev kóshesi arqyly ótetin kópirli jaıaý júrginshiler jolyn salý kózdelgen. Osyǵan baılanysty, aǵymdaǵy jyldyń 13 shildesinde saǵat 23:00-den Beıbitshilik kóshesiniń Bógenbaı batyr dańǵylynan bastap Esenberlın kóshesine deıingi bóligi, Jeńis dańǵylynan bastap Respýblıka dańǵylyna deıin Á. Moldaǵulova kóshesi boıynsha ótetin qozǵalys jabylatyn bolady.
Beıbitshilik, Á. Moldaǵulova, Mırzoıan kóshelerin qaıta jańartý 31 tamyz merzimine deıin avtokólik qozǵalysyn jabýdy talap etedi. Qonaev kóshesi - aǵymdaǵy jyldyń 1 qazanyna deıin jabylady.
Taratylǵan málimetterge qaraǵanda, jol qurylysy jumystaryn ótkizý men jol qozǵalysyn bir ýaqytta jabý qajettiligi ınjenerlik jelilerdi jabdyqtaý boıynsha úlken jumys kólemimen baılanysty. Joba sheńberinde jylý jelileri, sýmen qamtamasyz etý jáne kárizderdi aýystyrýdan basqa, joldy keńeıtý, qosymsha avtokólik oryndaryn salý, abattandyrý, sonyń ishinde jaryqtandyrý, kógaldandyrý, jaıaý júrginshige arnalǵan joldar men jańa baǵdarshamdar, jol belgilerin jáne jol qozǵalysyn retteıtin basqa da tehnıkalyq qurylǵylardy ornatý qarastyrylady.
