Astananyń memlekettik organdarynda 190 bos oryn bar - Jazıra Jylqyshıeva
«Ótken jyly memleketttik qyzmetkerlerdiń ádep máselesine arnalǵan 7 keńes ótti. Sol otyrystarda 33 másele qaraldy, onyń nátıjesin qorytyndylaı kele elordadaǵy memlekettik qyzmetkerlerdiń ádep kodeksin qatań saqtaıtynyn baıqaımyz. Buǵan taǵy bir dálel 2017 jyly 26 ádep normasyna qatysty tártiptik is qaralsa, ótken jyly 5 is qaraldy», - dedi QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Astana qalasy boıynsha departamentiniń basshysy Jazıra Jylqyshıeva elorda ákimdiginde ótken baspasóz máslıhatynda.
Sonymen qatar, departament basshysy elordadaǵy memlekettik qyzmetkerlerdiń sany men sapasynyń artýyna qatysty derektermen de bólisti.
«Búginde Astana qalasy boıynsha memlekettik qyzmetkerlerdiń shtat sany 3996 birlikti quraıdy, odan bólek 190 bos laýazym orny bar jáne 142 maman qyzmet aldyndaǵy tekserýden ótýde. Qyzmetkerlerdiń ortasha jas mólsheri 36, memlekettik qyzmettegi ortasha ótili 9 jyl. Sondaı-aq, memlekettik qyzmettegi áıelderdiń sany turaqty ósip keledi 2017 jyly 61% bolsa, ótken jyly qyzmettegi áıelder 62% qurady. Qazirgi ýaqytta elorda boıynsha memlekettik apparat quramynyń 94% joǵary bilimdi qyzmetkerler. Sonymen qatar, «Bolashaq» baǵdarlamasymen shetelde bilim alyp kelgenderdiń de sany artýda, 2017 jyly 11 adam bolsa, ótken jyly 18-ge ósti», - dedi ol.
Sonymen qatar onyń aıtýynsha, memlekettik qyzmetten ketýshilerdiń sany jyl sanap azaıýda. 2018 jyly ol kórsetkish aldyńǵy jylmen salystyrǵanda 1,4% azaıdy.
«Taǵy bir aıta keterligi, kadrlyq sheshimder qabyldaý kezinde merıtokratııa qaǵıdattarynyń saqtalýynyń basty nazarda ustaýdamyz. Merıtokratııa qaǵıdaty boıynsha ótken jyly 600-ge jýyq kadrlyq taǵaıyndaý boldy. Qazir árbir qyzmettik baıqaýdy qadaǵalaıtyn baıqaýshylar men sarapshylar ınstıtýty engizilgen. 2018 jyly memlekettik qyzmetke bos oryndar baıqaýynyń 97% atalǵan ınstıtýt ókilderiniń qatysýymen ótti», - dedi J.Jylqyshıeva.
