Astananyń memlekettik qyzmetshileri kim

Bul saýalǵa búgin Astana qalalyq Memlekettik qyzmet isteri jáne sybaılas jemqorlyqqa qarsy is-qımyl departamentiniń basshysy Tilegen Kaskın jaýap berdi, dep habarlaıdy QazAqparat.

«Memlekettik qyzmetter kadrlarynyń sapalyq jaı-kúıine júrgizilgen saraptama Astanada 69 memlekettik organnyń, onyń ishinde 32 jergilikti atqarýshy organnyń jáne ortalyq memlekettik organnyń 37 terrıtorııalyq bólimshesiniń bar ekendigin kórsetti. Shtattyq sany - 3966, al naqty qyzmetkerleri sany 3517 adam», - dedi Kaskın.

Onyń aıtýynsha, memlekettik qyzmetshilerdiń jalpy sanynyń 93 paıyzynda joǵary bilimi bar, olardyń 15-i ǵylym kandıdaty, al bireýi ǵylym doktory. 129 memlekettik qyzmetshi halyqaralyq baǵdarlamalardy bitirgen. Onyń ishinde 21 adam «Bolashaq» baǵdarlamasymen bilim alǵan. Olardyń úsheýi Astana qalasy ákimdigi apparatynda, bireýi Jer qatynastary basqarmasynda, 1-eýi Tótenshe jaǵdaılar departamentinde jáne taǵy bireýi Іshki memlekettik aýdıt departamentinde jumys isteıdi.  63 adam QR Prezıdenti janyndaǵy Memlekettik basqarý akademııasynyń túlegi.

«Memlekettik qyzmetshilerdiń 60 paıyzy - áıelder. Jalpy memlekettik qyzmetshilerdiń basym bóligin, ıaǵnı 37 paıyzyn 29 jasqa tolmaǵan jastar quraıdy. Memlekettik qyzmettegi ortasha qyzmet ótili  9 jyl, al qyzmetshilerdiń ortasha jasy - 33», - dedi departament basshysy.