Astananyń mektepterinde A gepatıtine 2 bala shaldyqqan - Bilim basqarmasy
ASTANA. 12 qazan. QazAqparat /Gúlmıra Alıakparova/ - Astananyń mektepterinde A gepatıtine 2 bala shaldyqqan.
Bul týraly búgin qala ákimdiginde vırýsty gepatıttiń aldyn alý máselesine arnalǵan dóńgelek ústel otyrysynda Bilim basqarmasynyń ókili Aına Qaspaqova aıtty.
Búgingi kúni Astanada jumys istep turǵan 139 memlekettik bilim berý mekemesinde 2011 jyldyń 1 qyrkúıeginde jaǵdaı boıynsha, 76 591 bala oqıdy. Solardyń ishinde, birinshi synypqa barǵan balalardy eseptemegende, 9 myń oqýshy - ózge óńirlerden bıyl kelgender.
«Olardyń densaýlyq jaǵdaılaryn bilý maqsatynda densaýlyq pasporttaryn jınadyq. Jazǵy maýsymda qalaǵa oqýǵa kelgender men birinshi synypqa barǵan 9 989 baldyrǵannyń 89 paıyzynda densaýlyq pasporty men anyqtamalary bar. Olardyń arasynda A gepatıtine shaldyqqandar joq. Onymen birge, jaz ýaqytynda elordanyń barlyq pedagogtary medıtsınalyq tekserýden 100 paıyz ótti», - dep naqtylady A.Qaspaqova.
Bilim basqarmasy ókiliniń aıtýynsha, búgingi kúni qalanyń mektepterinde A gepatıtimen 2 bala aýyrady. Vırýsty gepatıttiń aldyn alý maqsatynda 2011 jyly edáýir sharalar atqaryldy. Orta bilim beretin árbir mekemeniń, árbir synybynda aýany avtomatty túrde tazartyp otyratyn dıspenserlerdiń bolýy talap etilýde. Qazir ondaı dıspenserler mektepterdiń 50 paıyzynda bar. 2011 jyly orta bilim mekemelerin jýǵysh zattarmen qamtamasyz etý úshin 2008 jylmen salystarǵan 5 ese kóp qarajat bólindi. Qazir Bilim basqarmasy men Sanıtarlyq-epıdemıologııalyq qadaǵalaý departamentiniń mamandary mektepterdiń qol jýatyn oryndarynda suıyq sabyndardyń mindetti túrde bolýyn tekserýde.
