Astananyń medıtsına qyzmetkerleri BUU arnaıy medalimen marapattaldy

NUR-SULTAN. QazAqparat – Nur-Sultan qalasynyń medıtsına qyzmetkerleri Birikken Ulttar Uıymynyń medalimen marapattaldy, dep habarlaıdy QazAqparat elorda ákimdiginiń resmı saıtyna silteme jasap.

Konstıtýtsııa kúni qarsańynda №2 kópbeıindi qalalyq balalar aýrýhanasynyń qyzmetkerlerine Birikken Ulttar Uıymynyń arnaıy medali tabystaldy. Sondaı-aq densaýlyq saqtaýǵa qosqan úlesi úshin «AMANAT» partııasynyń alǵys hattarymen marapattaldy.

«Ata zań – elimizdegi barlyq quqyqtyq qatynasty retteıtin mańyzdy qujat. Elimizde 5 maýsym kúni referendým ótkizilip, zańnyń 33 babyna kóptegen mańyzdy protsesterdi retteıtin 60-qa jýyq túzetý engizildi. Konstıtýtsııa kúni qarsańynda biz medıtsına salasynyń qyzmetkerlerin quttyqtap, olardyń eńbegin erekshe atap ótkimiz keldi», - dedi «AMANAT» partııasy qalalyq fılıalynyń memlekettik basqarýdy damytý jáne sybaılas jemqorlyqqa qarsy is-qımyl jónindegi qoǵamdyq keńesiniń tóraǵasy Vladımır Savkın.

Sonymen qatar «Mektepke jol» aktsııasy aıasynda aýrýhana qyzmetkerleriniń (dárigerler, medbıkeler, sanıtarlar) oqýshy balalaryna arnalǵan oqý quraldary bar sómkeler tapsyryldy. Olardyń arasynda kópbalaly otbasylar, jalǵyzbasty analar, sondaı-aq múmkindigi shekteýli balalardy tárbıelep otyrǵan januıalar bar. «Mereke» qoǵamdyq qory daıarlyq synyptan 11-synypqa deıingi oqýshylar úshin jalpy sany 82 sómke daıyndaǵan.

Foto : gov.kz