Astananyń Máńgilik el dańǵylynda kólik keptelisi problemasy qashan sheshiledi
ASTANA. QazAqparat – Búgin BAQ ókilderiniń qatysýymen ótken brıfıngide Astana qalalyq Ákimshilik polıtsııa basqarmasynyń bólim basshysy Baýyrjan Toǵjumanov Máńgilik el dańǵylyndaǵy kólik keptelisi qashan sheshilýi múmkin ekenin aıtty, dep habarlaıdy QazAqparat tilshisi.
«Astanada jaqsartylǵan jol jáne kólik ınfraqurylymy, joldardyń ótkizý qabileti, jaıaý júrginshilerdiń qaýipsizdigine jaǵdaı jasalǵan. Máselen, qosymsha baǵdarshamdar ornatyldy, jaryqtandyrylǵan jaıaý júrginshilerge arnalǵan ótkelder salyndy, qozǵalys baǵytyn úılestiretin qoldanbaly jol belgileri qoıyldy.
Memleket basshysynyń tapsyrmasymen 2023 jyldyń sońyna deıin Táýelsizdik dańǵylynyń boıynda Esil ózeni arqyly ótetin avtomobıl kópirin ashý josparlanýda. Osyǵan oraı kólik qozǵalysyn ózgertý qarastyrylǵan. Bul – Máńgilik el dańǵylyndaǵy kólik júktemesin jáne keptelisti azaıtady», - dedi Baýyrjan Toǵjumanov.
Sonymen birge ol jyl basynan beri elorda aýmaǵynda 110 jol-kólik oqıǵasy tirkelip, saldarynan 6 adam qaza tapqanyn aıtty. Buǵan qosa, 123 adam ártúrli dene jaraqatyn alǵan.
Baýyrjan Toǵjumanovtyń dereginshe, bıyl Astanada jol erejesin saqtamaǵan 94 044 fakti anyqtalyp, 729 mln teńgeden astam somaǵa aıyppul salynǵan.
Málim bolǵandaı, qalada árbir besinshi jol apaty jaıaý júrginshiniń kinásinen bolady.
Bas qalada 27 myń júrgizýshiniń jalpy somasy 1 mlrd teńgeden astam aıyppul bereshegi bar.
