Astananyń «Lokomotıvi» Armenııa chempıonatynyń kúmis júldegerinen basym tústi
ALMATY. 24 aqpan. QazAqparat /Erlik Erjanuly/ - Astananyń «Lokomotıv» fýtbol klýby Túrkııadaǵy sońǵy oqý-jattyǵý jıyndaǵy aqyrǵy joldastyq kezdesýin keshe Erevannyń «Banants» aıaqdopshylarymen ótkizdi.
Armenııa chempıonatynyń jáne Armenııa kýbogynyń kúmis júldegerimen bolǵan bul oıynda astanalyqtar sapynan Nurbol Jumasqalıev pen Dmıtrıı Shomko mergendik tanytty. Bul eki dop ta alǵashqy taımda soǵyldy. Oǵan erevandyqtar oıynnyń ekinshi jartysynda jalǵyz doppen ǵana jaýap qata aldy.
Buǵan deıin «Lokomotıv» Belorýstyń «Vıtebsk» komandasymen 1:1 esebimen teń túsken edi. Onda da astanalyqtar sapynan Nurbol Jumasqalıev mergendigimen tanylǵan bolatyn.
Erteń «Lokomotıv» fýtbolshylary oqý-jattyǵý jıynynan Astanaǵa oralady. Olar 2 naýryzda Qostanaıdyń «Tobyl» fýtbol klýbymen Qazaqstan sýperkýbogyn sarapqa salmaq. Bul oıyn «Astana-Arena» sport kesheninde ótedi dep josparlanyp otyr.
