Astananyń kúndizgi jáne túngi bezendirilýi qazirgi elordanyń bet-kelbetine saı emes - Á. Jaqsybekov
ASTANA. QazAqparat - Búgin Astana ákimi Ádilbek Jaqsybekovtiń tóraǵalyǵymen ótken apparattyq jıyn barysynda turǵyndarǵa kórsetiletin qyzmet sapasy, ınvestıtsııa tartý, jańa oqý jylyna qala mektepterin daıyndaý jáne taǵy da birqatar ózekti máseleler talqylandy, dep habarlady qalalyq ákimdiktiń baspasóz qyzmetinen.
Ótken apparattyq jıyndardyń birinde elordadaǵy sýpermarketterdiń, saýda ortalyqtary men densaýlyq saqtaý mekemeleri, sondaı-aq, ózge de áleýmettik nysandardyń halyqqa kórsetetin qyzmetteriniń sapasyn arttyrý boıynsha másele kóterilgen bolatyn. Bul máselege turǵyndar da ún qosty. Qala basshysy atap ótkendeı, qalalyq qurylymdardyń basty jumys baǵyty elordalyq servıs deńgeıin jáne halyqqa kórsetiletin barlyq qyzmet túrleriniń sapasyn arttyrý bolýy kerek. Ákimniń aıtýynsha, bıýdjet saıasatynda memlekettik-jeke menshik seriktestik mehanızmin jıi paıdalanyp, ınvestorlardy tartý qajet. Elorda basshysy Astanada ınvestıtsııalyq qolaıly jaǵdaı jasaý eń ózekti másele bolyp otyrǵanyn atap ótti. Elordada 27-30 qazan aralyǵynda ótetin «Astana Invest - 2015» VI halyqaralyq ekonomıkalyq forýmy da osy túıtkildi máselelerdi sheshýge arnalady. - Bul jumysqa formaldy túrde qaramaý kerek. Kedergilerdi joıý boıynsha meniń qoıǵan talaptarym shuǵyl túrde júzege asýy qajet, - dedi ákim. Qala mektepteriniń jańa oqý jylyna daıyndyǵy jáne olardyń jaǵdaıy jaqsy bolǵanymen, ákim birqatar kemshilikterge de toqtala ketti. - Kóptegen qala mektepteriniń aýlalarynda sanıtarlyq jaǵdaı baqylanbaıdy. Salbyrap turǵan elektr symdary balalarǵa jaraqat salýy múmkin, mysaly. Mektep aýlalarynda turǵylyqty meken-jaıy joq tulǵalardyń júrýi. Munyń bárin mektep dırektorlary ǵana emes, qalanyń quziretti organdary da qadaǵalaý kerek, - dedi Á. Jaqsybekov. Taǵy bir ózekti másele bolyp vokzal aýmaǵyndaǵy jaǵdaı bolyp tabylady. Qaıyrshylar, «túngi kóbelekterdiń» qyzmetin usynatyn sýtenerler jáne vokzal aýmaǵyndaǵy qym-qýyt tirliktiń bári qala turǵyndary men qonaqtary tarapynan aıtylatyn kóp synǵa túrtki bolady. - Mysaly, «Vechernıaıa Astana» gazetiniń senbilik nómirinde tilshi ózge qaladan kelgen adam retinde kórinip, vokzal aýmaǵyndaǵy ómirdiń barlyq qyr-syryn ashyp bergen. Bul keshe ǵana oryn alǵan jaǵdaı emes. Іshki ister departamentinen vokzal aýmaǵyn tazartý boıynsha shara qabyldaýdy talap etemin, - dedi ákim. Qala basshysynyń aıtýynsha, PIK turǵyndarmen tikeleı baılanysta bolyp, árbir shaǵym men ótinishke der kezinde jaýap qatýlary kerek. Elordanyń bezendirilýi de, ákimniń pikirinshe, kóp synnyń astynda qalyp jatady. Astananyń kúndizgi jáne túngi bezendirilýi qazirgi elordanyń bet-kelbetine saı emes. - Eski materıaldar, gırlıandalar, jaryq dıodty shamdar qoldanylǵan. Munyń barlyǵy da eskirip bitken. Jańa, joǵary tehnologııalyq materıaldardy paıdalaný kerek. Bári birińǵaı kontseptsııaǵa baǵyný kerek, - degen ákim osy jumysty Qala qurylysy jáne sáýlet basqarmasyna baqylaýdy tapsyrdy. Qorytyndylaı kele, Á. Jaqsybekov Astana qalasynda turǵyndarǵa kórsetiletin qyzmet sapasy elorda statýsyna saı bolýy kerektigin taǵy bir atap ótti. Sondyqtan, qala qurylymdary turǵyndar men qala qonaqtaryna yńǵaıly jaǵdaı jasaý úshin barlyq salalardaǵy kem-ketikterdi joıýlary kerek.
