Astananyń kommýnaldyq qyzmetteri kúsheıtilgen rejimde jumys isteýde
ASTANA. QazAqparat - Elordada tasqyn sýlarǵa qarsy sharalardyń aıasynda qardy shyǵarý jumystary aıaqtalý kezeńinde. Búgingi tańda jeke sektor turǵyndary óz aýmaqtarynan shyǵarǵan qardan tazartý jumystary júrgizilip jatyr, dep habarlaıdy Astana ákimdiginiń resmı saıty.
Elordanyń kommýnaldyq qyzmetteri qaladaǵy sýdyń astynda qalǵan turǵyn úı alaptarynda kúsheıtilgen rejimde sýdy sorǵyshtarmen tartý jumystaryn júrgizýde. Búgin Astana ákiminiń orynbasary Qosman Aıtmuhametov bastaǵan top Saryarqa aýdanyndaǵy birqatar aýmaqty aralap, sý basqan alaptardy anyqtaǵan bolatyn. Mamandardyń aıtýyna qaraǵanda, turǵyndardyń ózderi qardy der kezinde shyǵarmaǵan aýdandarda úılerdi sý basqan.
"Qazir qar aralas jańbyr jaýyp jatyr. Aýa raıy durystalǵanda jumysqa qaıtip kirisemiz. Arnaıy tehnıka saqadaı saı. Saryarqa aýdany boıynsha kelip túsken ótinishter boıynsha jumys istep jatyrmyz. Kóshede nemese aýlada jınalǵan sý artyq degende 5 saǵattyń ishinde sorǵyshtarmen tartylady.Máselen, Ońtústik-shyǵys aýdanynda sýdyń jınalýyna nóser sý kárizdik júıeniń joqtyǵy sebep", -deıdi mamandar.
23 naýryzda Ońtústik-shyǵys aýdanynan qardyń 430 tekshe metri shyǵarylyp, sý ótkizetin qubyrlardyń 550 metri, aryqtar men nóser sý kárizdik júıesiniń 440 metri tazartyldy. Qardy shyǵarý, sýdy sorý jumystaryna arnaıy tehnıkanyń 70 birligi jumyldyryldy.
Aıta keteıik, qalanyń kommýnaldyq qyzmetteri sý basý qaýpin joıý maqsatynda qazirgi tańda táýlik boıy jumys isteýde. Elorda turǵyndary sý basý qaýpi máselesi boıynsha 109 nómiri arqyly qalanyń biryńǵaı baılanys ortalyǵyna habarlasyp, ózine qajetti kómekti ala alady.
