Astananyń kommýnaldyq qyzmetteri kúsheıtilgen rejımde jumys isteýde
ASTANA. QazAqparat - Qardyń kóp mólsherde túsýine baılanysty elordanyń kommýnaldyq qyzmetteri kúsheıtilgen rejımde jumys isteýde, dep habarlaıdy elorda ákimdiginiń baspasóz qyzmeti.
«Astana Tazalyq» JShS-iniń aqparatyna sáıkes, qala kóshelerine 173 tehnıka shyqqan. 290 adam jaıaý júrginshi joldar men gúlbaqtardy tazalaýǵa jumyldyryldy. Sonymen qatar, joldarǵa qum-tuz qospasy sebilýde.
Sınoptıkterdiń boljaýy boıynsha, erteń, 26 qazanda, Astanada kóshpeli bult shyǵyp, kúndiz azdap qar jaýady. Soltústik-batystan, batystan 9-14 m/s jyldamdyqpen jel soǵady. Aýa temperatýrasy túnde -8...-10°S, kúndiz -3...-5°S bolady.
27 qazanda kóshpeli bult shyǵady, qar jaýady, syrǵyma burqasyn soǵady. Batystan 9-14 m/s jyldamdyqpen jel soǵady. Aýa temperatýrasy túnde -6...-8°S, kúndiz -1...-3°S bolady.
