Astananyń kommýnaldyq qyzmetteri kúsheıtilgen rejimde jumys istep jatyr
ASTANA. QazAqparat - Jaýyn sýynyń jınalýyna qatysty elordanyń barlyq kommýnaldyq qyzmetteri kúsheıtilgen rejimde jumys istep jatyr, dep habarlaıdy QazAqparat Astana ákimdiginiń saıtyna silteme jasap.
«Qala aýmaǵynda 3 120 tekshe metr erigen qar sýy sorǵytyldy jáne 7 070 tekshe metr qar shyǵaryldy. 346 jańbyr sýy aǵatyn tor tazalanyp, jýyldy. Halyq kóp jınalatyn 143 nysanda qardan tazartý jumystary ýaqytynda júrgizildi. Sondaı-aq, sý tasqynyna qarsy sharalar aıasynda qala aýdandaryndaǵy jeke sektorlardan qar shyǵarý jumystary jalǵasýda», - delingen Astana ákimdigi saıtyndaǵy resmı habarlamada.
Eske sala ketsek, Astanada sý tasqyny kezeńine daıyndyq jumystary bastalyp ketti. Buǵan deıin elorda ákimi sý tasqynyna qarsy sharalardyń keshendi josparyn bekitti. Jospar 202 bólikten turady jáne olarǵa jaýapty atqarýshy retinde ákimdiktiń 22 qurylymdyq bólimshesi, 8 mınıstrlik organdary men bólimsheleri jáne 2 kommýnaldyq kásiporyn belgilengen.
«Astana monıtorıng jáne jedel áreket etý ortalyǵynyń qaladaǵy qar tazalaýdyń sapasyn baqylaýynyń arqasynda kommýnaldyq qyzmetter qala aýmaǵy men turǵyn úı alabyndaǵy qardy ýaqytynda shyǵaryp júrgenin atap ótken jón. Ruqsat etilmegen jerde qar úıindisin kórseńiz, qalalyq monıtorıng jáne jedel áreket etý ortalyǵynyń 109 nómirine habarlasyńyz nemese Facebook, Instagram jelilerinde #astana109 heshtegimen jazba qaldyryńyz», - delinen qala ákimdiginiń saıtynda.
Foto: hicarus.ru
