Astananyń kommýnaldyq qyzmeti kúsheıtilgen rejımge kóshirildi
ASTANA. QazAqparat - Astana ákimi Áset Isekeshev júrgizýshiler men jaıaý júrginshilerdi aýa raıynyń qolaısyzdyǵyna baılanysty qaýipsizdik sharalaryn barynsha saqtaýǵa shaqyrdy, dep habarlaıdy QazAqparat.
«Elordanyń turǵyndary men qonaqtarynyń nazaryna! «Qazgıdromet» málimetterine sáıkes, búgin bizde kóshpeli bult shyǵyp, qar jaýady jáne kúndiz aýa temperatýrasy 0... -2, al túnde -5...-7 gradýs bolsa kóktaıǵaq bolýy múmkin. Erteń de bultty bolyp qar jaýady. Kúndiz aýa temperatýrasy -3... -5, al túnde -7.... -9 gradýs bolady. Aýa raıynyń qolaısyzdyǵyn eskerip qaýipsizdik sharalaryn barynsha saqtaýǵa shaqyramyn», - dep jazdy Áset Isekeshev Feısbýktegi paraqshasynda.
Qala basshysy júrgizýshiler men jaıaý júrginshilerge de jeke eskertý jasady.
«Kólik quralyn basqarý barysynda jyldamdyq rejımi men qashyqtyqty saqtańyzdar, kúrt burylys jasamańyzdar. Jaıaý júrginshiler burqasynda barynsha qyraǵylyq tanytyńyzdar. Kósheni tek jaıaý júrginshilerge arnalǵan jerlerden kesip ótińizder», - dedi elorda ákimi.
Sonymen qatar ol qar tazalaýǵa jaýapty merdiger uıymdar kúsheıtilgen jumys rejımine kóshkendigin jazdy.
«Joldarǵa arnaıy tehnıkalardyń shyǵýyna baılanysty joldyń ótkizý qabiletti ýaqytsha tómendeýi múmkin. Osyǵan baılanysty qalada qozǵalǵanda óz baǵdarlaryńyzdy aldyn ala josparlaýǵa keńes beremiz», - dedi ol.
