Astananyń qoǵamdyq kólikterindegi elektrondy tólem júıesi jyl sońyna qaraı iske qosylady
ASTANA. QazAqparat - Astana qalasynda qoǵamdyq kólikterdegi tólem júıesin elektrondy túrge kóshirý aǵymdaǵy jyldyń sońyna qaraı júzege asyrý josparlanǵan. Osyǵan baılanysty tamyzdyń 1-nen bastap jeńildikterge ıe turǵyndar sanaty úshin arnaıy tólem kartochkalaryna fotoǵa túsý sharasy bastalyp ketti, dep habarlaıdy elorda ákimdiginiń resmı saıty.
Elorda turǵyndarynyń atalmysh toby jergilikti atqarýshy bıliktiń sheshimimen qoǵamdyq kólikterde tegin júrý quqyǵyna ıe bolady. Búgingi tańda jeńildikterge ıe turǵyndar tiziminde tirkelgen 86 myń adamnyń 20 myńǵa jýyǵy fotoǵa túsip úlgerdi.
«Bizdiń kompanııa qazirgi ýaqytta Astana boıynsha ІTS júıesin engizýmen aınalysýda. Bul - ıntellektýaldy kólik júıesi. Sonyń nátıjesinde qoǵamdyq kólikterdegi qyzmet kórsetý sapasy jaqsarady dep kútilýde», - deıdi «Astana LRT» JShS ІT-tehnologııalar jáne baılanys bóliminiń jetekshisi Sergeı Popov.
Qazirgi ýaqytta avtobýstarda Eýropadan satyp alynǵan arnaıy valıdatorlar ornatylýda. Sonymen qatar, elektrondy tólem júıesin iske qosardyń aldynda qala boıynsha arnaıy avtomattar ornatylmaq. Atalmysh avtomattar arqyly turǵyndar bir rettik jáne uzaq merzimdi jol júrý bıletterin satyp ala alady.
«Kondýktorlardy jumystan qysqartý kózdelmegen. Olar konsýltant qyzmetin atqarady. Biliktilikti arttyrý ortalyqtarynda olar arnaıy oqýdan ótedi», - deıdi S. Popov.
