Astananyń qoǵamdyq kólikterinde qandaı ózgerister bolady
ASTANA. QazAqparat - Astanada jaqynda qalaishilik jańa ekspress baǵdar jolǵa shyǵyp, taǵy bir baǵyttaǵy avtobýs kópsyıymdy qoǵamdyq kólikke aýystyrylady. Qalaishilik baǵdarlardaǵy tyń jańalyqtar týraly «QazAqparat» HAA tilshisiniń joldaǵan saýalyna oraı «Astana LRT» JShS-nyń baspasóz hatshysy Naýat Azanbaeva aıtyp berdi.
«Jýyq arada jańa №104 ekspress baǵdar iske qosylady. Jańa avtobýs 2018 jyldyń 10 aqpanynan bastap Sýsamyr kóshesi men «Azııa park» OSO aralyǵynda qatynaıdy. Sonymen birge, 7 aqpannan №11 avtobýstyń marshrýty «Kırpıchnyı» turǵyn alabyna deıin uzartylyp, 3 aqpannan bastap №100 avtobýs «Prıgorodnyı» turǵyn alabyna da qyzmet kórsetetin bolady. 2018 jyly jańa ekspresti jáne túrlendirilgen baǵdarlardy (máselen, 4 jáne 4A, 22 jáne 22A) ashý kózdelýde», - dep habarlady Naýat Azanbaeva.
Onyń atap ótýinshe, qala ishinde qozǵalys kóbeıetin ýaqytta jolaýshylarǵa yńǵaıly jol júrisin qamtamasyz etý úshin avtobýstardyń tolymdylyǵyna turaqty túrde taldaý júrgizilip otyrady.
«Osy baǵytta taldaý jumystary júrgizilip jatyr. Aldaǵy ýaqytta kópsyıymdy 18 metrlik qoǵamdyq kólikterdi iske qosý josparda bar. Naqtyraq aıtqanda, №8 avtobýstar kópsyıymdy avtobýstarǵa aýystyrylady», - dedi Naýat Azanbaeva.
