Astananyń qoǵamdyq kóliginde jol júrý aqysyn tóleý tásilderi kóbeıdi
ASTANA. QazAqparat - Astananyń qoǵamdyq kóliginde jol júrý aqysyn 5 tásilmen tóleýge bolady, dep habarlaıdy QazAqparat.
Elorda ákimdiginiń málimetinshe, qyrkúıekten bastap jolaýshylarǵa, sondaı-aq elorda qonaqtaryna yńǵaıly bolý úshin «City Transportation Systems» kompanııasy jol aqysyn tóleýdiń elektrondyq júıesin jańǵyrtýdy iske qosady. Jańa júıege tolyq kóshý jyl sońyna qaraı júzege asyrylady.
Búgingi tańda avtobýstarda tólem QR-kodty bankter men uıaly baılanys operatorlarynyń qosymshalarymen, sondaı-aq «Transcard» kólik kartasymen júrgiziledi. Sonymen qatar, jańa avtobýstarda jol aqysyn tóleýdiń qosymsha arnalary paıda bolady: ekinshi deńgeıdegi bankterdiń banktik kartasy jáne NFC tehnologııalary arqyly, Bluetooth arnasy arqyly.
Onlaın rejımde JTEJ mynadaı múmkindikterdi beredi:
Transcard kólik kartalaryn jedel tolyqtyrýdy iske asyrý jáne ekinshi deńgeıdegi bankter men tólem uıymdarynyń barlyq qoljetimdi servısterinde barlyq qoldanystaǵy tarıfter boıynsha jol aqysyn onlaın rejıminde tóleý (bıylǵy qazan aıynda, avtobýstardy jańa jabdyqpen qajetti jaraqtandyryp, keıinnen aldyńǵy júıede paıdalanylatyn kólik kartalarynyń jańa júıede tirkelýine qaraı qoljetimdi bolady);
ekinshi deńgeıdegi bankterdiń banktik kartalary arqyly jol aqysyn tóleý tásilderin keńeıtý, NFC kontaktisiz tólem (smartfon, smart saǵat), QR kodtaryn oqý arqyly, Bluetooth tehnologııasy;
júıeniń barlyq operatsııalaryn onlaın rejımde monıtorıngileý jáne tólemderdiń barlyq túrleri boıynsha bóle otyryp, jasalatyn valıdatsııalardy usynylatyn júıede kórsetý jáne naqty ýaqyt rejıminde derbes esepke alýdy jáne jalpy jolaýshylar aǵynyn júzege asyrý múmkindigi;
mobıldi qosymshalarda belsendi halyq úshin jáne azamattardyń jeńildikti sanaty, sondaı-aq oqý oryndarynyń oqýshylary úshin vırtýaldy kartany engizý múmkindigi.
Búgingi kúni elordanyń jol aqysyn tóleýdiń elektrondyq júıesiniń barlyq jabdyqtary men baǵdarlamalyq kesheni oflaın rejıminde jumys isteıdi, bul rette júıe obektıvti moraldyq turǵydan eskirgen jáne neǵurlym ozyq jáne ózekti sheshimge jańǵyrtýdy/aýystyrýdy talap etedi.
Atap ótý kerek, qoldanystaǵy kólik kartalaryn aýystyrý kózdelmeıdi, joǵaryda atalǵan barlyq ınnovatsııalar 2023 jyldyń sońyna deıin josparly túrde engiziledi jáne «Onlaın» rejıminde jumys isteıtin jańa júıege kezeń-kezeńimen kóshýdi kózdeıdi. Basty maqsat – elorda turǵyndary úshin qolaısyzdyqtar týǵyzbaıtyn jańǵyrtýdy júrgizý.
