Astananyń kıeli jerlerine velotýr uıymdastyrylady

ASTANA. QazAqparat - Іshki týrızmdi damytý, qala turǵyndary arasynda salamatty ómir saltyn nasıhattaý maqsatynda bıyl «Qasıetti Astana» ataýymen elordanyń kıeli oryndaryna velotýr uıymdastyrylady dep josparlanýda, dep habarlaıdy QazAqparat ákimdiktiń saıtyna silteme jasap.  

Búgin QR Ulttyq mýzeıinde Elbasynyń «Bolashaqqa baǵdar: Rýhanı jańǵyrý» baǵdarlamalyq maqalasynyń 1 jyldyǵyna arnalǵan «Rýhanı jańǵyrý» kórmesi ótti. Oǵan óńirlerdegi «Rýhanı jańǵyrý» jobalyq keńseleriniń ókilderi, ǵalymdar, mádenıet qaıratkerleri, «Qazaqstannyń 100 jańa esimi» jobasynyń jeńimpazdary, aımaqtyq jáne respýblıkalyq BAQ-nyń ókilderi qatysty.

Keń aýqymdy shara barysynda «Rýhanı jańǵyrý» baǵdarlamasyn iske asyrýdyń 1 jyldyq qorytyndylary shyǵarylyp, 2018 jylǵa arnalǵan josparlar ortaǵa salyndy. 
     

«Qasıetti Astana» velotýry «Rýhanı jańǵyrý» baǵdarlamasy aıasynda ótpek. Sharaǵa zııaly qaýym ókilderi, otandyq estrada juldyzdary, el sportshylary qatysady dep kútilip otyr. 

Astana qalasynyń «Rýhanı jańǵyrý» jobalyq keńsesinde atap ótkendeı, velotýr 4 baǵyttan turady. Bul: «Qazaq eli» monýmenti - «Otan qorǵaýshylar» monýmenti - Beıbitshilik jáne kelisim saraıy, «Máńgilik el» qaqpasy - «Astana-Báıterek» monýmenti - «Bozoq» qalasy, «Asharshylyq qurbandaryna eskertkish» monýmenti - «Jasyl» meshit qorshaýy - Kúıgenjar qorymy baǵyttary. 

Aıta keteıik, 2018 jyly Astanada «Rýhanı jańǵyrý» baǵdarlamasynyń aıasynda «Arhıvter sóıleıdi», «Ár nárestege bir aǵashtan», «Qaıyrymdylyq Dobrota: «1000 da 1 alǵys» sııaqty 79 joba iske asady.