«Astananyń kıeli jerleri» kartasyna 20 tarıhı-mádenı mura eskertkishi kiredi
ASTANA. QazAqparat - «Astananyń kıeli jerleri» kartasyna 20 tarıhı-mádenı mura eskertkishi kiredi. Bul týraly búgin «Rýhanı jańǵyrý» baǵdarlamasyn júzege asyrý máseleleri jónindegi sarapshylar tobynyń otyrysynda Astana qalasy ákiminiń orynbasary Ermek Amanshaev málim etti, dep habarlaıdy QazAqparat.
«Memleket basshysy «Bolashaqqa baǵdar: rýhanı jańǵyrý» atty baǵdarlamalyq maqalasynda qazirgi álemdegi básekege qabilettilikke, ásirese mádenı básekege qabilettilikke basa nazar aýdarǵa bolatyn. Sóz álem jurtshylyǵy bizdi munaı resýrstarymen qatar syrtqy saıası bastamalarymyzben ǵana emes mádenı jetistikterimizben bilýi tıistigi jaıynda bolyp otyr», - dedi ol.
Onyń aıtýynsha, atalǵan jaıtqa oraı taıaý ýaqytta «Elorda mádenıeti» baǵdarlamasy qabyldanatyn bolady. Onda Astanada mádenıet pen ónerdi damytýǵa baǵyttalǵan sharalar kózdeledi.
«Buǵan qosa, tanymal qazaqstandyq rejısserler, dramatýrgter men stsenarııshilerdiń shyǵarmashylyq áleýetterin barynsha paıdalana otyryp, elordanyń mádenı trendterin jáne jańa trendterin odan ary ilgeriletýge basymdyq beriledi. Bul baǵdarlamanyń negizgi jobalarynyń biri elorda aýmaǵyndaǵy 20 tarıhı-mádenı mura eskertkishin toptastyratyn «Astananyń kıeli jerleri» kartasy bolmaq. Olardyń ishinde «Bozaq» memorıaldy-sakraldy kesheni erekshe oryn alady», - dedi Astana ákiminiń orynbasary.
