Astananyń keıbir kósheleri jaryqsyz qaldy
ASTANA. QazAqparat – «Astana aımaqtyq elektr jelilik kompanııasy» elordanyń ishinara jaryqsyz qalýyna baılanysty túsinikteme berdi, dep habarlaıdy QazAqparat tilshisi.
Áleýmettik jelide Astananyń Baıqońyr aýdanynda elektr jaryǵy óship qalǵany týraly málimetter men sýretter taraǵan bolatyn. Bul málimetti qalany elektr qýatymen jabdyqtaýǵa jaýapty kompanııa rastady.
«Astana» 110/10 kV qosalqy stansasynda elektr qýatynyń ajyraýy oryn aldy. Jumysshylar aqaýdyń sebebin anyqtap jatyr», - delingen Astana aımaqtyq elektr jelilik kompanııasynyń baspasóz qyzmetiniń habarlamasynda.
Kompanııa málimeti boıynsha, jaryqtan ajyraǵan úılerdiń keıbirine qazirdiń ózinde elektr qýaty qaıta qosyla bastaǵan.
Sondaı-aq jaýapty mamandar aqaýdyń naqty sebebin, anyqtap, málimdeýge ýáde berip otyr.
Foto: t.me/astanovka98
