Astananyń Qazirgi zaman óneri murajaıynda 1957-2011 jyldary salynǵan kartınalar kórmesi ashyldy
ASTANA. 18 aqpan. QazAqparat - Elordalyq Qazirgi zaman óneri murajaıynda «Aıaz jáne kún, keremet kún!» taqyryptyq kartınalar kórmesi jumysyn bastady, dep habarlady Astana qalasynyń resmı saıty uıymdastyrýshylarǵa silteme jasap.
«Ekspozıtsııaǵa 1957 men 2011 jyldar aralyǵynda Qazaqstan, Belarýs jáne Reseı sýretshileri salǵan 19 polotno qoıyldy», - delingen habarlamada.
«Qazaqstandyq» jıyntyqtan belgili qylqalam sheberleri Vladımır Eıferttiń («Boran») jáne Jańataı Shardenovtyń («Almaty qaıyńdary») týyndylaryn kórýge bolady.
Sonymen qatar, kórmede kelýshilerge Aqmolanyń baıyrǵy sýretshisi Mıhaıl Geıdtyń «Tyń ıgerýshiler» (1977 jyly salynǵan) jáne Tselınograd Sýretshiler odaǵy bólimshesiniń beldi músheleri: Vıktor Holýevtyń («Alǵashqy qar. Tselınograd»), Alekseı Terehovtyń («Borannan soń»), Ivan Svıtıchtyń («Shet jaq», «Qyraý», «Natıýrmort. Alǵashqy qar»), QR Eńbek sińirgen qaıratkeri Marat Toqsaıytovtyń («Kún batarda») kartınalary usynylǵan.
Kórmeni kelesi: «EKSPO - Nıý-Iork - 2011» halyqaralyq art-baıqaýynyń laýreaty Tóleýǵazy Baıǵalıevtyń «Astana» («Fonarı-1»), tanymal pavlodarlyq sýretshi Evgenıı Frıdlınniń «Aı týdy» («Tún»), almatylyq sýretshi Jambyl Natbaevtyń («Qys») polotnosy jáne jas sýretshi Anar Ábjanovanyń («Kóńilsiz peızaj») kartınalar tolyqtyrady.
«Aıaz jáne kún, keremet kún!» taqyryptyq kartınalar kórmesi murajaıda 3 naýryzǵa deıin jumys isteıdi.
