Astananyń qaı núktelerinde tegin WI-FI paıdalanýǵa bolady
ASTANA. QazAqparat - Búginde elordanyń 26 qoǵamdyq ornynda tegin WI-FI qyzmetin paıdalanyp, ınternetke kirýge bolady, dep habarlaıdy QazAqparat.
Agenttiktiń resmı saýalyna oraı elorda ákimdiginen kelgen málimetterge sáıkes, olardyń qatarynda Astana qalasynyń halyqaralyq áýejaıy, temir jol jáne avtobýs vokzaldarymen qatar «Kerýen», «Arýjan», «Han Shatyr», «Azııa park» syndy oıyn-saýyq saýda ortalyqtary bar. Munan bólek, Alaý muz aıdyny men Alataý sport kesheninde de ǵalamtorǵa tegin kire alasyz. Sonymen qatar elordanyń birqatar meıramhanasynda da tegin WI-FI núktesi ornatylǵan.
Jalpy, búgingi kúni bul jobany «The One capital» kompanııasy tolyqtaı qarjylandyryp, shyǵynnyń bárin óz moınyna alyp otyr. Sońǵy ýaqytta tegin WI-FI núktesin elordalyqtardyń belsendi túrde paıdalana bastaǵanyn baıqaýǵa bolady. Máselen, osy jyldyń ishinde ǵana bul núktelerge 1 685 800 biregeı paıdalanýshy qosylyp, olar 79 225 gıgabaıt trafık jaratqan.
Aıta keterligi, búgingi kúni elordanyń 550 qoǵamdyq avtobýsynda da tegin WI-FI núktesi ornatylǵan. Degenmen, sońǵy ýaqytta symsyz ınternetti paıdalaný erejesine engizilgen ózgerister men uıaly baılanys operatorlarynyń 4 G júıesine aýysýyna baılanysty qoǵamdyq kólikterge ornatylǵan qural-jabdyqtardy qaıta ornatý jumystary júrgizilýde.
