Astananyń qaı kósheleri abattandyrylady
ASTANA. QazAqparat – Elordalyq ýrbanıstıka ortalyǵynyń bólim basshysy Aslan Qandyǵulov qalany abattandyrý boıynsha qandaı jumystar atqarylǵanyn baıandady, dep habarlaıdy QazAqparat.
«Aqbulaq ózeniniń jaǵalaýy Amman kóshesi men Táýelsizdik dańǵylyna deıin abattandyryldy. Al kópirlerdiń astynda Aqbulaq ózeni boıyndaǵy saıabaq klasterin jalǵaıtyn jaıaý júrginshiler ótkelderi ashyldy. Sátbaev kóshesindegi jaıaý júrginshiler jolynyń birinshi bóligi ashyldy. Esil ózeniniń jaǵasynda Beısekov kóshesinen Kóktal eldi mekenine qaraı qoǵamdyq keńistikti abattandyrý jumysy júrip jatyr. Osylaısha, amfıteatr, sport alańdary, serýendeý oryndary, oıyn alańqaılary jabdyqtalady», - dedi A. Qandyǵulov Astana kommýnıkatsııalar qyzmetinde ótken brıfıngte.
Sonymen birge, ortalyq jaǵalaýdyń tarıhı kósheleri – Jeltoqsan, Beıbitshilik, Buqarbaı batyr, Á. Mámbetov kósheleri kórkeıip keledi. Bul jumystar jańa qoǵamdyq keńistikterdi buryn qurylǵan keńistiktermen baılanystyrýǵa múmkindik beredi. ıAǵnı «Demalys promenad» jaıaý júrginshiler kóshesi, «Teatralnyı» býlvary, «Qalalyń alań» tutas klaster bolmaq.
Sonymen birge, Aqan seri – Fahd ben Abdýl, Kenesary – Beısekbaev, Kenesary – Egemen Qazaqstan, Qordaı – N.Ahmetbekov kósheleriniń qıylysynda, Abylaı han dańǵylynan Qudaıberdiuly dańǵylyna deıingi jaǵalaýda, K.Ázirbaev kóshesi, 10, Hrapatyı kóshesindegi qoǵamdyq keńistikter abattandyryldy.
Bógenbaı batyr dańǵylynda Sh. Aımanov kóshesinen Sh. Ýálıhanov kóshesine deıingi 10 aýlany qamtıtyn sharshy alań abattandyrylady. Sh. Qudaıberdiuly dańǵyly 5, 31, 36, 36/3, Qoshqarbaev dańǵyly 26, 39, Kúıshi Dına kóshesi 46/1, 46/3, Músirepov kóshesi 9 jáne basqa da mekenjaılarda jumys júrgizilýde.
Almaty aýdanynda barlyǵy 66, Baıqońyr aýdanynda – 32, Saryarqa aýdanynda – 30 aýla men qoǵamdyq keńistik abattanady, onda kógaldandyrýǵa basymdyq beriledi.
«Qaladaǵy Ýálıhanov pen Sátbaev kóshelerin keshendi abattandyrý jumystary aıaqtalýda. Kúmisbekov-Qosshyǵululy kósheleriniń qıylysynda, Bógenbaı batyr dańǵylynyń boıynda jańa qoǵamdyq keńistikter qurylýda. Qala ortasynda 496 myń jáne Astananyń jasyl beldeýinde 457 myń kóshet egiledi. Kóktemde Máńgilik el, Uly Dala dańǵyldary, Beısekov, Sharl de Goll, Sátbaev kósheleri kógaldandyryldy. Biz jergilikti klımatqa beıimdelgen aǵash túrlerin egemiz. Kóshetter elordalyq jylyjaılarda ósirilip, kóktemde jáne kúzde otyrǵyzylady», - dedi Aslan Qandyǵulov.
