Astananyń qaı aýdandarynda ınternet sapasy nashar

ASTANA. QazAqparat – QR Tsıfrlyq damý, ınnovatsııalar jáne aeroǵarysh ónerkásibi mınıstrligi telekommýnıkatsııa komıtetiniń tóraǵasy Erjan Meıramov elordadaǵy ınternettiń sapasy týraly suraqtarǵa jaýap berdi, dep habarlaıdy QazAqparat tilshisi.

«Biz zańnama deńgeıinde bekitilgen baılanys sapasynyń sáıkestigin tekseremiz jáne qazir naqty problemalyq aýmaqtardy bilemiz. Astana boıynsha bul – Hanshatyrdyń arty, «Manhetten» TK, Barys Arena jáne sport klasterleriniń aınalasy. Bul jerdegi úlken problema – radıofobııa bolyp otyr. Onda biz ákimdikpen birlesip, júıeli sheshim tabýǵa tyrysamyz. Eger bazalyq stantsııany qandaı da bir naqty úıge ornatý múmkindigi bolmasa, jer ýchaskesin nemese turǵyn úı kesheniniń arasyna ornatý múmkindigin izdeımiz nemese oǵan deıin bazalyq stantsııalardy ornalastyratyn antenna-dińgek ornatý múmkindigin qarastyramyz», - dedi Erjan Meıramov vedomstvo alqasynyń keńeıtilgen otyrysynda.

Spıkerdiń aıtýynsha, munda zańnamalyq másele de bar.

«Ókinishke qaraı, bizde zańnama máselesi bar. Turǵyn úıde kem degende bir radıofob bolsa da onyń pikiri eskeriledi. Bizge zańnamany ózgertý qajet, onda bir adamnyń pikirine baılanysty halyqtyń qalǵan bóligi zardap shekpeýi kerek degen túzetýler bolady. Sondyqtan depýtattar arqyly túzetýlerdi usyndyq», - dep atap ótti E. Meıramov.

Aıta keteıik, elordada Tsıfrlyq damý, ınnovatsııalar jáne aeroǵarysh ónerkásibi mınıstrliginiń keńeıtilgen alqa otyrysy ótti, onda mınıstrlik jetekshilik etetin baǵyttardaǵy jumystyń qorytyndylary men basymdyqtary talqylandy.