Astananyń qaýipsizdigine baǵyttalǵan úzdik startap jobalar anyqtaldy

  ASTANA. QazAqparat - Startap baıqaý nátıjesinde úzdik dep tanylǵan jobalar qala qaýipsizdigi úshin júzege asyrylatyn bolady, dep habarlaıdy QazAqparat tilshisi.

Úsh kúnge sozylǵan Astana Innovations Challenge aıasyndaǵy Startup Weekend jobasyna 230-dan astam adam tirkelip, olar ózara 26 komandaǵa bólindi. Baıqaýda 26 joba usynylyp, onyń 11-i fınalǵa shyqty.

Ádilqazylar fınalda úzdik dep tanylǵan 3 jobany anyqtap, 1 mln teńge turatyn júlde qoryn úsh orynǵa bólip berdi.

«Astana Innovations Challenge aıasynda buǵan deıin «málimetterdiń ashyqtyǵy» jáne «aqyldy qala» taqyryptarynda startap sharalar uıymdastyryldy. Bul joly «Qaýipsiz qala» taqyrybyndaǵy startap jobalarǵa arnadyq. Qalanyń barynsha qaýipsiz bolýy jolyndaǵy úzdik degen jobalar úsh kún ishinde jasalyp, anyqtaldy. Taǵy bir aıta keterligi, oryn almaǵan jobalar da eleýsiz qalmaıdy. Óıtkeni, osy sharany uıymdastyrýdaǵy áriptes kompanııalar keıbir jobalardy júzege asyrýǵa qyzyǵýshylyq tanytyp otyr. Jáne atalǵan joba óz jalǵasyn tabady.Ústimizdegi jyly ınnovatsııa taqyrybyna arnalǵan taǵy úsh sharany ótkizý josparda tur», - dedi «Astana Innovations» AQ-nyń basqarma tóraǵasy Oljas Sartaev.  
 

Startup Weekend-tiń úzdik dep tanylǵan úsh jobasy:

1 oryn - FaceR komandasy bet-beıneni tanýǵa arnalǵan platforma;

2 oryn - Qaz Aqua komandasy SOS batyrmasy men qaýipsizdik taıanysh ornatylǵan fýnktsııalary bar GPS bilezik; 

3 oryn - Stop Bop komandasy vıdeokameradan qylmyskerdiń bet-beınesin tanýǵa arnalǵan júıe.

Sonymen qatar, atalǵan shara aıasynda óz kásibin jańadan bastaǵan jas iskerler úshin sarapshylar men bıznesmender tájirıbelerin ortaǵa salyp, tabysqa jetý qupııalarymen bólisti.
  

Aıta keteıik, qaýipsiz qala taqyrybynda 6 baǵyt boıynsha jumys istegen jas startapshylar jobasy osydan eki kún buryn bastalǵan.