Astananyń qarjy polıtsııasy 100 mln. teńge jalǵan aqshamen baılanysty iri alaıaqtyq qylmysyn ashty
ASTANA. 12 qyrkúıek. QazAqparat - Astana qalasy boıynsha qarjy polıtsııasy departamenti asa iri kólemde jalǵan aqsha jasaǵan qylmystyq topty áshkereledi.
Atalǵan departamenttiń baspasóz hatshysy Gúljanat Qushtarovanyń aıtýynsha, atalǵan qylmystyq top nomınaly 10 000 teńgelik aqshalardy jasaýmen aınalysqan. Olar osy jalǵan aqshany elimizdiń birqatar óńirlerinde taratyp ta úlgergen kórinedi. «Máselen, tek astanalyq departament jyl basynan nomınaly 10 000 teńgelik jalǵan aqshalardy anyqtaý faktileri boıynsha 314 qylmystyq is qozǵady»,-dedi ol.
Bul qylmystyq top ótken jyldyń tamyzynan bastap osy qylmyspen aınalysqan eken. Olardyń músheleri Jambyl jáne Ońtústik Qazaqstan oblysynyń 7 turǵynynan qurylǵandyǵy belgili boldy. Sonymen qatar qazirgi kezde atalǵan qylmysqa basqa da azamattardyń qatystylyǵy tekserilýde. «Departament qyzmetkerleri eldiń birneshe aımaqtarynda jedel-izdestirý sharalaryn júrgizdi. 20 mln. teńgeden asatyn jalǵan aqsha jáne ony daıyndaýǵa arnalǵan jabdyqtar tárkilendi. Atap aıtqanda, Taraz qalasynda jalǵan aqshany daıyndaýǵa arnalǵan zamanaýı kompıýterlik jabdyqtar joıyldy»,-dedi baspasóz hatshysy.
Tergeý barysynda belgili bolǵandaı, atalǵan jalǵan aqsha elimizdiń Batys, Ońtústik jáne Soltústik óńirlerinde taraǵan.
Kúdiktiler bul qarjyny sybaılastary arqyly shaǵyn toptamalarmen ótkizip otyrǵan. Óz aldyna sybaılastar ony iri qalalarǵa nemese alys eldi mekenderge tasymaldaǵan. Jalǵan 10 myńdyqtyń bir danasy 3 myń teńgege satylǵan kórinedi nemese saýda oryndarynda satýshylardyń ańǵaldyǵyn paıdalanyp, jalǵan aqshamen olardan usaq taýarlar alyp, paıdaǵa kenelgen.
Departament qyzmetkerleriniń málimetinshe, atalǵan qylmystyq top el óńirlerinde 100 mln. teńge kóleminde qarjyny taratyp úlgerýi múmkin.
