Astananyń qalyptasýynda Elbasynyń eńbegi zor - Nesipbek Aıtuly
ASTANA. QazAqparat - Astana halyqaralyq áýejaıyna Elbasy Nursultan Nazarbaevtyń esimin berý - laıyqty is. Áýejaıdan bólek, tutas elordanyń Astana bolyp qalyptasýyna Nazarbaevtyń sińirgen eńbegi orasan zor. Mundaı pikirdi QR Memlekettik syılyǵynyń laýreaty, qoǵam qaıratkeri, aqyn Nesipbek Aıtuly bildirdi.
Óz sózinde aqyn jıyrma jyl buryn el astanasyn Saryarqa tósine kóshirgen Elbasynyń eńbegin erekshe atap ótti.
«Astana áýejaıyna Nursultan Nazarbaevtyń esimin bergenin estip, qýanyp otyrmyn. Elbasynyń bar eńbegin jıyp qoıyp, el astanasyn Saryarqa tósine kóshirgeni úshin de altynnan eskertkish qoıýǵa bolady. Sebebi, qıyn-qystaý zamanda el astanasyn aýystyrý ońaı sharýa emes. Bul sheshimniń naǵyz kóregendik ekenine endi kózimiz jetip otyr. Jıyrma jyl buryn jazyq dalada jańa qala boı kóteredi degenge eshkim senbep edi, endi mine sol Astanada aıdaı álem kóz tigip otyrǵan halyqaralyq EKSPO-2017 kórmesi ótip jatyr», - dedi ol.
Sondaı-aq, N.Aıtuly álemniń ozyq memleketterinde el basqarǵan eren tulǵalardyń atymen atalatyn áýejaılardyń bar ekenin aıtyp, búgingi qaýlynyń naǵyz laıyqty sheshim ekenin jetkizdi.
«Kezinde Petr І soltústikten jańa qalanyń irgetasyn qalap edi, sol Petrden mura bolyp qalǵan ásem Sankt-Peterbýrg búginde tutas Reseıdiń maqtanyshyna aınaldy. Bir kezderi Astanany Nazarbaevtyń atymen qaıta ataýdy usynǵanda da qoldaý bildirgenmin. Ol ýaqyttyń enshisindegi másele. Al búgingi áýejaıdy Nazarbaevtyń atymen ataý - shyn máninde laıyqty sheshim», - dep óz sózin túıindedi aqyn.
Aıta keteıik, búgin Qazaqstan Respýblıkasy Úkimetiniń 2017 jylǵy 20 maýsymdaǵy № 381 qaýlysyna sáıkes Astana halyqaralyq áýejaıyna QR Prezıdenti Nursultan Nazarbaevtyń esimi berildi . Sonymen birge, memleket menshigindegi obektilerge jeke adamdardyń esimin berý qaǵıdalaryna da ózgeris engizildi .
