Astananyń irgesinde jarııalanǵan tótenshe jaǵdaıǵa baılanysty shuǵyl áreketter júzege asyrylýda
KÓKShETAÝ. QazAqparat - Aqmola oblysy Arshaly aýdanynyń Jibek joly aýylyndaǵy "Bezymıannaıa" sý bógetin nyǵaıtý jumystary júrgizilýde, dep habarlaıdy "QazAqparat" HAA tilshisi aımaqtyq TJD baspasóz qyzmetine silteme jasap.
Eske sala keteıik, Arshaly aýdany Jibek joly aýylynyń ońtústik-shyǵys jaq tusynda ornalasqan "Bezymıannaıa" sý bógeti 1968 jyly salynǵan bolatyn. Sý bógetiniń uzyndyǵy 2 shaqyrym, bıiktigi 3-4 metrdi quraıdy. Ortalyq tusynda sý aǵyzatyn eki shlıýz ornalasqan. Nysan 2016 jylǵa deıin ıesiz turdy. Qazirgi kezde Arshaly aýdanynyń kommýnaldyq menshigine alyndy.
Jaqynda «Bezymıannaıa» sý bógeti shlıýziniń apatty jaǵdaıyna baılanysty aýdan ákimi Azamat Taıjanovtyń sheshimimen aýdan aýmaǵynda tótenshe jaǵdaı jarııalanǵan bolatyn. Atalǵan bógettiń gıdrotehnıkalyq qurylysyndaǵy beton jáne shlıýzderdiń buzylýynan gıdrodınamıkalyq apat qaýpi týyndaǵan. Jaqynda aýdanǵa jumys saparymen barǵan oblys ákiminiń orynbasarlary Dáýren Ádilbekov pen Janbolat Smaıylov, QR ІІM Tótenshe jaǵdaılar komıteti tóraǵasynyń orynbasary,
azamattyq qorǵanys polkovnıgi M.Kýldıkov, Aqmola oblysy boıynsha TJD basshysy Alekseı Sovetovtiń qatysýymen kóktemgi sý tasqyny kezinde apatqa jol bermeý maqsatynda ınjenerlik sharalardy júzege asyrý úshin kóshpeli jedel məjilis ótti.
Onda atalǵan bógettiń barlyq ýchaskeleri zerttelip, tótenshe jaǵdaıǵa jol bermeý joldary qarastyryldy. Osy məjilis qorytyndysyna saı shlıýzderdiń mańyna eldi mekendi sý tasqynynan qorǵaý úshin qosymsha jasandy bóget turǵyzylyp, sý ótkizetin dıametri 1000 mıllımetr eki qubyr ornatý jóninde sheshim qabyldandy. Bul atalǵan shlıýzderge túsetin aýyrtpalyqty azaıtpaq. Sondaı-aq, tótenshe jaǵdaı oryn ala qalǵan kezde jergilikti atqarýshy organdar tarapynan iske asyrylatyn shuǵyl áreketteri saralandy.
Sonymen qatar, TJD basshysynyń 17.02.2017 jylǵy №27 buıryǵyna sáıkes departament bólimsheleri men quramy joǵary deńgeıdegi daıyndyqqa kóshti. Qazirgi kezde 200 qap qum, 600 tonna ınertti materıaldar men beton bloktar jetkizildi.
