Astananyń halyqaralyq reıtıngi Barselona, Stambýl sekildi qalalarymen teńesti
ASTANA. QazAqparat - Ótken jyly qalanyń ekonomıkasyna tartylǵan ınvestıtsııalardyń jyl saıynǵy ósimi 397 mıllıard teńgeden 773 mıllıard teńgege deıin 1,5 esege artty, bul Astananyń halyqaralyq reıtıngin Ba3 deńgeıine deıin kóterýge jáne Barselona, Stambýl jáne álemniń basqa da iri qalalarymen teńesýge múmkindik berdi. Búgin qalalyq máslıhattyń kezekten tys sessııasynda Astana qalasy ákiminiń orynbasary Andreı Lýkın osylaı málim etti, dep habarlaıdy elordanyń resmı saıty.
- Biz 2012 jyldan beri Moody's agenttigimen belsendi jumys istep kelemiz. Ústimizdegi jyly elorda respýblıkalyqpen bir deńgeıde turǵan ınvestorlar úshin tartymdy reıtıngtiń Ba3 deńgeıin rastady. Mysaly, Barselona, Stambýl, Madrıd jáne basqa da qalalarǵa da reıtıngtiń osy deńgeıi berilgen, - dedi baıandamashy.
A. Lýkınniń habarlaýynsha, qalany damytýdyń 2011-2015 jyldarǵa arnalǵan baǵdarlamasyn júzege asyrý Astanaǵa Qazaqstannyń barlyq óńirleriniń ishinde áleýmettik-ekonomıkalyq damýdyń negizgi kórsetkishteri boıynsha aldyńǵy qatardan oryn alýǵa múmkindik berdi.
- Baǵdarlama júzege asyrylǵan bes jyldyń ishinde jalpy óńirlik ónim kóleminiń naqty kórsetkishi 2010 jylǵy 1 trln 800 mln teńgeden 2015 jyly 4 trln 600 mlrd teńgege deıin 1,6 esege ulǵaıdy. Ótken jyldyń qorytyndysy boıynsha elordada ekonomıkalyq ósimniń oń úrdisi baıqalady - 106,3 paıyz. Bul rette Astananyń respýblıkanyń JІÓ-niń jalpy kólemindegi úlesi sáıkesinshe, 8 paıyzdan 11 paıyzǵa deıin ósti. Ónerkásiptik óndiris kólemderiniń naqty kórsetkishi 2010 jylmen salystyrǵanda 111 mıllıard teńgeden 348 mıllıard teńgege deıin 1,4 esege artty, - dedi ákimniń orynbasary.
Sonymen qatar, qala basshysynyń orynbasary qalanyń týrıster úshin de asa tartymdy ekendigin atap ótti. Bes jyldyń ishinde Astanaǵa 3 mln-nan astam qonaq kelse, onyń 650 myńy sheteldikter.
