Astananyń Halyqaralyq áýejaıyna 23,6 mln teńge aıyppul salyndy
ASTANA. QazAqparat - Astananyń Halyqaralyq áýejaıyna 23,6 mln teńge kóleminde aıyppul salyndy. Bul týraly «Habar 24» arnasy habarlady.
Ulttyq ekonomıka mınıstrliginiń Tabıǵı monopolııalardy retteý, básekelestikti jáne tutynýshylardyń quqyqtaryn qorǵaý komıtetinen málim etkendeı, áýejaıdyń birneshe kelisimshart jasaýda zańsyz áreketterge barǵany anyqtaldy. Atap aıtqanda, munaı ónimderin saqtaý úshin qoldanylatyn ydystardy jalǵa alý sharttary buzylǵan. Sondaı-aq avıatsııalyq otyndy satýǵa qatysty kelisimderdiń de erejege saı oryndalmaǵany belgili bolǵan.
Aıta keteıik, Astana qalasynyń ákimshilik soty osy jyldyń tamyz aıynda áýejaıǵa aıyppul salý jóninde sheshim shyǵarǵan edi. Al aktsıonerlik qoǵam basshylary munymen kelispeı, apellıatsııalyq shaǵym túsirgen bolatyn. Alaıda Astana qalalyq soty sheshimdi ózgerissiz qaldyryp, áýejaıdy ákimshilik jaýapqa tartý jóninde sheshim shyǵardy.
