Astananyń «Farab» án-bı teatry «Varna- 2011» halyqaralyq festıvalinde el namysyn qorǵamaq

S.Seıfýllın atyndaǵy QazATÝ stýdentterinen quralǵan «Farab» án-bı teatry buǵan deıin de kóptegen shet elderde óner kórsetip, qazaq ónerin nasıhattap keledi. Solardyń arasynda, Bolgarııada ótken «Sofııa-2010» halyqaralyq folklorlyq festıvalin ataýǵa bolady. Onda teatr ujymy qazaqtyń án-bılerin oryndap, sheteldik óner súıer qaýymdy tánti etip qaıtqan bolatyn.

«Bul Qazaq agrotehnıkalyq ýnıversıtetiniń halyqaralyq baılanystardy óner arqyly nyǵaıtý baǵytynda jasap jatqan izgi qadamdardyń biri. Sebebi, óner men mádenıet - til men dildi tańdamaıtyn, árdaıym dostastyq kepili bolyp tabylatyn álemdik rýhanı mura», - dep atap ótti teatrdyń kórkemdik jetekshisi Meıirjan Álıakbarov.

1-10 tamyz aralyǵynda ótetin «Varna- 2011» HH Halyqaralyq folklorlyq festıvalin Varna qalasy Mýnıtsıpalıteti (Bolgarııa memleketi) men Mádenıet departamenti uıymdastyryp otyr. Baıqaýǵa 25 elden 34 óner ansambli qatysýǵa nıetterin bildirdi. Festıvalǵa tek 8 eldiń bı ujymdary shaqyrtý aldy. Solardyń biri - «Farab» án-bı teatry. «Farab» Qazaqstannan shaqyrtýǵa ıe bolǵan jalǵyz bı ujymy bolǵandyqtan, halyqaralyq óner dodasynda el namysyn abyroımen qorǵaýǵa nıetti. QazATÝ stýdentteri baıqaýda ádettegideı, qazaqtyń ulttyq bıleri men halyq ánderin oryndaıtin bolady.