Astananyń etnomádenı birlestikteriniń ókilderi QR Prezıdentin saılaýǵa qatysýda

ASTANA. QazAqparat - Qazaqstan Respýblıkasynyń Prezıdentin saılaý Astana qalasynyń №98 saılaý ýchaskesinde de ótip jatyr. Saılaý ýchaskesiniń tóraıymy Quralaı Muqyshevanyń sózinshe, saılaý zańǵa sáıkes jáne demokratııalyq túrde ótýde.

Barlyǵy ýchaskede 2431 saılaýshy tirkelgen, olardyń 30-y alǵash ret daýys berip otyr. Qazirgi ýaqytta 200-den astam adam daýys berip úlgerdi.

Saılaý táýelsiz baqylaýshylar, saılaý ýchaskesiniń tóraǵasy, senimdi tulǵalar men BAQ ókilderiniń qatysýymen ótýde.

Búgin №98 saılaý ýchaskesinde Astana qalasyndaǵy "Lad" slavıan etnomádenı birlestiginiń ókili de óz daýysyn berdi.

- Búgin elimiz úshin óte mańyzdy kún, eldiń bolashaǵy - bizdiń daýysymyzda. Árıne, daýys berý bizdiń azamattyq paryzymyz. Biz jas memlekette turyp jatyrmyz, biz memleketimizdiń qarqyndy damýy úshin óz daýysymyzdy beremiz. Qazaqstan halqy Assambleıasynyń 20 jyldyǵynda biz 20 jyl boıy atqarǵan eńbegimizdiń jemisin kóremiz dep oılaımyn, - dedi etnomádenı birlestik ókili Valentına Papenko.

Sonymen qatar, Astananyń jastary da birinshi ret saılaýǵa qatysyp, óz daýystaryn berýde.