Astananyń eń talantty oqýshylary anyqtalady
ASTANA. 12 qarasha. QazAqparat - Elorda mektepteriniń oqýshylary Qazaqstan Respýblıkasynyń Tuńǵysh Prezıdenti Kúni merekesi aıasynda uıymdastyrylyp otyrǵan kóshbasshy-oqýshylar baıqaýyna qatysady.
Bul týraly astana.kz habarlaıdy.
«Biz ár balaǵa syılyq daıyndap jatyrmyz. Óıtkeni, atalymdar boıynsha barlyǵynyń da daıyndyǵy joǵary deńgeıde. Osy rette aıta ketetin jaıt, ár saıystyń óz júldegeri bolady. Alaıda, baıqaýǵa qatysyp otyrǵan ár oqýshy jeńis tuǵyrynan kórinýge laıyqty der edim», - deıdi Astana qalasy Bilim basqarmasynyń bastyǵy Ásıma Bımendına.
Baıqaýdyń aqtyq máresi 20 qarashada Oqýshylar saraıynda ótedi dep josparlanyp otyr. Aıta ketý kerek, barlyǵy 48 mektep oqýshylary qatysyp, joǵary ball jınap, esse jazyp, tarıh, bıologııa, geografııa pánderi boıynsha dúnıetanymyn kórsetip, oq boıy ozyq shyqqan 20 oqýshy aqtyq márege joldama aldy. Búginde olardyń ekeýi Ýkraınada ótip jatqan Halyqaralyq forýmda el dańqyn asqaqtatýda.
Baıqaýdy uıymdastyrýshylar bul ıgi bastamany jyl saıyn ótkizýdi josparlap otyr. Demek, bul Astana mektepteriniń bilim deńgeıin kóterýmen qatar jastardyń patrıottyq sezimderin oıatyp, olardy otansúıgishtikke tárbıeleýde zor yqpal eteri sózsiz.
