Astananyń emhanalarynda úsh júzden astam shetel azamaty em qabyldady
ASTANA. QazAqparat - Qazaqstannyń bas qalasynda medıtsınalyq týrızm damyp keledi, dep habarlaıdy Astana ákimdiginiń resmı saıty.
Respýblıkalyq densaýlyq saqtaýdy damytý ortalyǵynyń málimetine súıensek, ótken jyly qalanyń 9 jetekshi emhanasynda 300-den astam sheteldik em qabyldaǵan. Olarǵa kardıohırýrgııa, transplantologııa, EKO, ońaltý, ortopedııa sııaqty klınıkalyq baǵyttar boıynsha kómek kórsetilgen bolatyn.
Mundaı málimetter búgin Astananyń jetekshi klınıkalaryna jasalǵan aqparattyq medıtsınalyq týr barysynda keltirildi. Sharaǵa týrıstik operatorlar, elordalyq týrızm qaýymdastyǵynyń ókilderi men blogerler qatysty.
Týrǵa qatysýshylar Ulttyq kardıhırýrgııa ortalyǵyna, Ulttyq neırohırýrgııa ortalyǵyna, Ana men bala ulttyq ǵylymı ortalyǵyna, «QR Prezıdenti isterin basqarý medıtsınalyq ortalyǵynyń» aýrýhanasyna, Ulttyq ǵylymı medıtsınalyq ortalyqqa, sondaı-aq, «Úmit» tomoterapııa men ıadrolyq medıtsına ortalyǵyna baryp qaıtty. Shara aıasynda qatysýshylarǵa neırohırýrgııa, kardıohırýrgııa, ortopedııa, onkologııa, EKO sııaqty klınıkalyq baǵyttar boıynsha ınnovatsııalyq medıtsınalyq qyzmetter, «Check-up» (dıagnostıka) qyzmetteri, sáýlelik dıagnostıka tanystyryldy.
Kezdesý barysynda medıtsınalyq týrıster arasynda suranysqa ıe medıtsınalyq ortalyqtar bólimderi qyzmetiniń negizgi aspektileri jaıly aıtyldy.
Máselen, rentgen operatsııalar jasalatyn bólmeler, «Carto» apparatynyń jumysy, tomoperapııanyń kómegimen qaterli isik aýrýlaryn emdeý tásilderi kórsetildi.
Eske salaıyq, búgin medıtsınalyq mekemeler, olardyń usynatyn qyzmetteri men mamandary, mekemede bar qural-jabdyqtar týraly aqparatty alýǵa múmkindik beretin www.medicaltourism.kz biryńǵaı onlaın-portaly iske qosylǵan bolatyn.
Budan bólek, medıtsınalyq týrızmge qatysty «Call-ortalyq» jumysyn bastady. Qazaqstandyq jáne sheteldik patsıentter ózine qajetti aqparat pen keńesti 1430 nómiri boıynsha táýlik boıy ala alady.
