Astananyń elıtaly turǵyn úıleri jaryqsyz qalǵanyna táýlikten asty
ASTANA. QazAqparat - «Astana-REK» mamandary eki turǵyn úı keshenin energııamen qamtamasyz etetin úlestirý pýnktindegi apatty joıýmen aınalysýda.
Bul týraly elorda ákimdiginiń baspasóz qyzmetinen málim etti.
«Astana-REK» AQ-nyń habarlaýynsha, 5 aqpanda jergilikti ýaqyt boıynsha saǵat 23:53-te eki turǵyn úı keshenin («Italıanskıı kvartal» jáne «Gorodskoı romans») elektr energııasymen qamtamasyz etetin 187-úlestirý pýnktine qýat jetkizetin eki joǵary voltty kabel isten shyqty. Apatqa qysqa tuıyqtalý sebep bolǵan.
«Qazirgi kezde mamandar apat saldaryn joıyp, jóndeý jumystaryn júrgizýde. Jeliniń osy bóliginde kabelder jıi urlanatyndyqtan kabeldiń búlingen bóligin anyqtaý múmkin bolmaı otyr. Búginde atalǵan energııa sharýashylyǵy jáne ÚP-187 qalalyq jelilerdiń balansynda joq. Nysandardyń ıesi - «BazısInvestStroı» kompanııasy. Kabel jelisiniń uzyndyǵy 2,5 km quraıdy», - dep habarlandy ákimdikten.
«Astana-REK» mamandary turǵyn úı keshenderiniń jalpy qajettilikteri úshin jedel túrde dızeldik generatorlar ornatty. Munymen qosa, tıisti qyzmetter apatty joıý boıynsha barlyq sharalardy qabyldaýda. Osy maqsatta barlyq jeke quram men tehnıka, jabdyqtar tartylǵan. Qazirgi kezde jumystar jalǵasýda.
