Astananyń ekonomıkalyq ındıkatory ósimniń oń dınamıkasyn kórsetti
ASTANA. QazAqparat - Astananyń turǵyn úılerdi paıdalanýǵa berýdegi úlesiniń kólemi 23% quraıdy, bul Qazaqstandaǵy aımaqtardyń ishinde alda kele jatqanyn bildiredi, dep habarlaıdy elorda ákimdiginiń resmı saıty.
Bul málimetti astananyń jarty jyldyqtaǵy áleýmettik-ekonomıkalyq qorytyndysyna arnalǵan jıynda Áset Isekeshev málimdedi.
«EKSPO obektilerin, kóptegen TK men kommertsııalyq nysandardy tapsyrýǵa qatysty ótken jyl aıtarlyqtaı «qıyn» bolǵanyna qaramastan, adamdar úshin jaıly qala qurýda astananyń ekonomıkalyq saıasaty jappaı kásipkerlik pen jekemenshik ınvestıtsııany qoldaýǵa baǵyttaldy. Ósimniń joǵary bazasyna qaramastan, barlyq ekonomıkalyq ındıkatorlar oń nátıje kórsetti», - dedi astana ákimi.
«Nurly jer» baǵdarlamasy sheńberinde Astana ákimdigi osy jyly 18,7 mlrd teńge kóleminde memınvestıtsııa aýdardy, onyń ishinde turǵyn úı qurylysy baǵdarlamasyn iske asyrý úshin 12,9 mlrd teńge jáne ınjenerlik-kommýnıkatsııalyq ınfraqurylymdy damytýǵa 5,8 mlrd teńge bóldi.
Ótken jyly turǵyn úı qurylysyna jekemenshik ınvestıtsııadan 134,7 mlrd teńge kelip tústi, al jyl basynan 2018 jyly 88,7 mlrd teńge (qańtar-mamyr) boldy. Osylaısha, jekemenshik ınvestıtsııa birneshe ret memlekettikinen asyp tústi.
Jyl basynan astanada «Nurly jer» turǵyn úı qurylysy baǵdarlamasyn iske asyrý sheńberinde Astana ákimdiginiń tapsyrysymen salynǵan 3 kópqabatty úıde myńnan astam adam qonys toıyn toılady. Jyl sońyna deıin taǵy da úsh turǵyn úı kesheni paıdalanýǵa beriledi.
Sonymen birge, «Nurly jer» turǵyn úı qurylysy baǵdarlamasy sheńberinde sońǵy úsh aıda Astana qalasy ákimdigimen 720 adam jańa páterge kóshti, onyń ishinde 410 adam - kezektegiler.
«Jyl sońynda «Nurly jol», «Nurly jer» memlekettik baǵdarlamalaryn iske asyrý esebinen jospardaǵy kórsetkishten shyǵamyz dep otyrmyz», - dedi Á. Isekeshev.
Osy jyly birneshe iri jobalardyń qurylysy josparlanyp otyr: jańa LRT transport júıesi, nóser kárizdik qurylysy, TEO-2, TEO-3 jáne basqa da obektiler. Jyl sońyna deıin oń dınamıka beretin 470,5 mlrd teńge somasynda jobalardy engizý josparlanýda.
