Astananyń eki bazarynda órt shyqty
ASTANA. QazAqparat - Búgin Astana qalasyndaǵy eki bazardan órt shyqty, dep habarlaıdy qalalyq tótenshe jaǵdaılar departamentiniń baspasóz qyzmeti.
Tańǵy saǵat 08.31-de «101» pýltine Alash tas joly, 4 mekenjaıynda ornalasqan Sharyn bazarynyń aýmaǵynda ashana órtenip jatyr degen birinshi habarlama túsken. Arada 8 mınýt ótkende oqıǵa ornyna órt sóndirý bóliminiń kezekshi qaraýylyndaǵy órt sóndirýshileri jetken.
«Anyqtalǵandaı, «Sharyn» azyq-túlik bazarynyń aýmaǵyndaǵy ashana retinde paıdalanylǵan 40 sharshy metr aýmaqtaǵy metall konteınerdiń ishindegi jıhaz, aǵash tósemeler órtengen. Saǵat 08.40-ta kómekke shaqyrylǵan bólimshe keri qaıtaryldy»,-delingen baspasóz qyzmetiniń aqparatynda. Jalpy, qyzyl jalyn 12 mınýt ishinde aýyzyqtalǵan.
Sonymen qatar, saǵat 10.00-ge jýyqtaǵan ýaqytta Ortalyq bazar aýmaǵynda taǵy bir konteıner órtene bastaǵan. Órt sóndirýshiler oqıǵa ornyna 6 mınýtta jetken.
«Kıim-keshek satatyn Ortalyq bazar aýmaǵynda 15 sharshy metr jerdi alyp jatqan konteınerde er adamdardyń qysqy kıimderi órtene bastady. Órt sóndirýshiler órtti birden óshirdi»,-dep habarlap otyr TJD. Jalpy, eki órtti sóndirý úshin jeke quramdaǵy 3 tehnıka men 17 qyzmetker jumyldyrylǵan.
