«Astananyń» burynǵy qarsylasy bir-aq apta jumys istegen bapkerin qyzmetinen bosatty
ASTANA. QazAqparat - «Sportıng» Sınısha Mıhaılovıchtiń bas bapker qyzmetinen ketkenin málimdedi, dep habarlaıdy «SPORTINFORM» SAA klýbtyń resmı saıtyna silteme jasap.
49 jastaǵy maman komandany bir aptadaı ǵana basqardy. Biraq ony Lıssabonǵa shaqyrǵan burynǵy prezıdent Brýný de Karvalıý basshylyqtan ketkendikten, klýb kelisimshartty buzýǵa sheshim qabyldady.
Jańa prezıdent Soýza Sıntranyń aıtýynsha, Mıhaılovıch klýbtyń jańa maýsymdaǵy josparyna kirmeıdi. Oǵan kelisimshart buzylýyna baılanysty, 300 myń eýro mólsherinde ótemaqy (neýstoıka) tólenedi.
Eske sala keteıik, «Sportıng» Eýropa lıgasynda «Astanaǵa» qarsylas bolyp, 1/8 fınalǵa beriletin joldama úshin kúsh synasqan bolatyn. Eki oıyn nátıjesi boıynsha 6:4 esebimen portýgalııalyqtar kelesi aınalymǵa ótken.
