Astananyń botanıkalyq baǵynda tropıkalyq jemister pisip jatyr
Onda tsıtrýstyq kýmkvat jemisi segiz aıda úshinshi ret jemis berip otyr.
«Astanada alǵash ret banan aǵashy jemis túıdi. Bul jemister áli pisken joq. Italııa tálimbaǵynan jetkizilgen bul aǵashtardyń Astana botanıkalyq baǵyna jersinýine shamamen 6 aı ǵana qajet boldy. Bizdiń baqta banan aǵashtary eki esege deıin úlkeıdi. Qazir olardyń butaqtaryn bólek alyp, kóbeıtip jatyrmyz», - dedi Botanıka jáne fıtoıntrodýktsııa ınstıtýtynyń bas dırektory Gúlnar Sıtpaeva.
Onyń aıtýynsha Mundaǵy sýarý, klımatty qadaǵalaý júıeleri avtomattandyrylǵan.
«Tropıkalyq aǵashtardyń ózin jaıly sezinýi úshin temperatýra 24 gradýstan, ylǵaldyq - 70% tómen túspeýi kerek. Tsıtrýstyq kýmkvat jemisi segiz aıda úshinshi ret jemis berip otyr. Bul - joǵary deńgeıli kútim men eńbektiń nátıjesi», - dedi ınstıtýt basshysy.
Sonymen birge, G. Sıtpaeva botanıkalyq baq janynan jartylaı óndiristik jylyjaı ashylatynyn habarlady. ıAǵnı, qala turǵyndaryna tropıkalyq ósimdikterdi úı ishinde ósirý múmkindigi berilmek.
Oranjereıalyq keshende jalpy sany 70-ten asatyn tropıkalyq jáne sýbtropıkalyq ósimdik túrleri bar. Al sýkkýlentter bóliminde kaktýs pen aloe ósimdikteriniń 60-tan astam túri bar.
Aıta keteıik, Astananyń Botanıkalyq baǵy 2018 jyly Elordanyń 20 jyldyǵy qarsańynda ashylǵan bolatyn. Onda fıkýs, lımon, dratsen, apelsın, paportonık, palma jáne t.b. tropıkalyq memleketterden ákelingen 1100 ósimdik otyrǵyzylǵan. Ekinshi klımatronda 960 sýkkýlent otyrǵyzylǵan. Olardyń arasynda álemde sırek kezdesetin kollektsııalyq kaktýstar men gıbrıdter bar.
