Astananyń blokbeketterindegi qyzmetkerler úshin aqsha jınalyp jatqan joq – komendant
NUR-SULTAN. QazAqparat – Nur-Sultan qalasy Polıtsııa departamentiniń basshysy-elorda komendanty Erjan Sádenov tótenshe jaǵdaı rejımi kezinde el tynyshtyǵyn kúzetip turǵan polıtseıler men basqa da quqyq qorǵaý organdarynyń qyzmetkerleri úshin qarajat jınap, azyq-túlik ákelýdiń qajeti joqtyǵyn eske saldy, dep habarlaıdy QazAqparat tilshisi.
«Tótenshe jaǵdaı rejımi jarııalanǵan kúnnen bastap polıtseıler, QR Ulttyq ulany men Qorǵanys mınıstrliginiń áskerı qyzmetshileri táýlik boıy jumys isteýde. Qala turǵyndary tártip saqshylaryna azyq-túlik ákelýde. Qamqorlyq tanytqan azamattarǵa erekshe alǵysymdy bildiremin. Qala komendatýrasy barlyq qyzmetkerdi tolyq kólemde qajetti zattarmen, onyń ishinde 3 mezgil ystyq tamaqpen jáne qorǵanys quraldarymen qamtamasyz etip jatyr. Jumys aýysym boıynsha uıymdastyrylýda», - dep jazdy Erjan Sádenov Facebook-paraqshasynda.
Onyń aıtýynsha, tártip saqshylarynyń densaýlyq jaǵdaıy medıtsına qyzmetkerleriniń erekshe baqylaýynda.
«Qala komendatýrasy shot ashyp, qarajat jınamaýǵa jáne ystyq tamaq (shaı jáne taǵy basqa) alyp kelmeýge shaqyrady. Sondaı-aq blok-beketterdegi qyzmetkerlerge kómek kórsetý úshin qarjy jınalatyny jóninde ártúrli sıpattaǵy aqparattarǵa senbeńizder», - deıdi ol.
