Astananyń BQO-daǵy kúnderi: Elordalyqtar iri kásiporyndarmen tanysty
ORAL. QazAqparat - Elordanyń 20 jyldyǵyna oraı Batys Qazaqstan oblysyna kelgen astanalyq delegatsııa óńirdegi iri kásiporyndardyń tynys-tirshiligimen tanysty, dep habarlaıdy QazAqparat tilshisi.
Óńiraralyq yntymaqtastyqty nyǵaıta túsý maqsatynda Astana qalasy ákiminiń orynbasary Ermek Amanshaev bastaǵan delegatsııa óńirdegi irgeli kásiporyn «Oral saýda-ónerkásip kompanııasy» JShS-da boldy. Kásiporyn metall jabyny, proflıst, sondaı-aq gaz, sý, kárizge arnalǵan dıametri 20-dan 1600 mıllımetrge deıingi polıetılen, polıpropılen qubyrlaryn shyǵarady. Nemis jabdyǵymen jumys jasaıtyn kompanııa, ásirese, Qazaqstanda alǵashqy bolyp dıametri 1600 mm polıetılen qubyrlaryn shyǵardy.
Astanalyq meımandar sondaı-aq «Steklo Servıs» JShS-nyń tsehtaryn da aralap kórdi. Munda da jetekshi álemdik óndirýshilerden alynǵan jabdyqtar ornatylǵan. Sondyqtan ónimder sapalylyǵymen, beriktigimen erekshelenedi. Sonyń bireýin E.Amanshaev synap kórip, ústine turǵanda, áınek shytynaǵan da joq. Qazirgi kezde kásiporynnyń Aqtóbe, Atyraý, Orynbor, Samara qalalarynda fılıaldary, al Astanada ókildigi bar. «Steklo Servıs» JShS óz ónimderin Qazaqstan óńirlerimen qatar Reseıdiń birqatar iri qalalaryna da shyǵarady. Atap aıtqanda, ónimniń 31 paıyzǵa jýyǵy Reseıge jóneltiledi.
Astana qalasy ınvestıtsııalar jáne damý basqarmasy basshysynyń orynbasary Erlan Bekmurzaev ózderi bolǵan oraldyq kásiporyndardyń bári de qazirgi zamanǵy talaptarǵa saı keletinin jetkizdi. Olardyń birqatary Astana qurylysyna, sonyń ishinde «EKSPO-2017» qalashyǵyn turǵyzýǵa qatysqany belgili.
Eske sala keteıik, elordanyń 20 jyldyǵyna arnalǵan Astana qalasynyń Batys Qazaqstan oblysyndaǵy kúnderi erteń márege jetedi.
