Astananyń birqatar kóshelerinde kólik qozǵalysy shekteledi - Jol polıtsııasy
ASTANA. Shildeniń 22-si. QazAqparat - Shildeniń 23-i jáne 26-sy kúnderi aralyǵynda Astana qalasynyń birqatar kóshelerinde kólik qozǵalysy tolyq nemese jartylaı shekteledi. Bul týraly Jol polıtsııasy basqarmasynyń baspasóz qyzmeti málim etti.
«Erteń, shildeniń 23-i kúni saǵat 22.00-de ınjenerlik jelilerdi jańartý jumystarynyń bastalýyna baılanysty Abylaıhan jáne Muńaıtpasov kósheleriniń qıylysyndaǵy kólik qozǵalysy tolyǵymen shekteletin bolady», deıdi baspasóz qyzmeti.
Baspasóz qyzmetiniń málim etýinshe, sondaı-aq Spetsmontajnaıa - Lıteınaıa kósheleriniń qıylysy jartylaı jabylady. Sebebi munda shildeniń 24-i men 26-sy aralyǵynda qudyqtardy ornatý boıynsha jumystar júredi.
Osyǵan oraı, Astana qalasynyń Jol polıtsııasy basqarmasy kólik júrgizýshilerine aldyn ala basqa da tıimdi jol baǵyttaryn tańdaýǵa keńes beredi.
