Astananyń birqatar kósheleri jóndeýge jabylady

Bul týraly búgin jýrnalısterge Astana qalalyq Jolaýshylar kóligi jáne avtomobıl joldary basqarmasy bastyǵynyń orynbasary Aıtqazy Aryqbaev pen elordanyń Jol polıtsııasy basqarmasy jol baqylaý bóliminiń bastyǵy Nurlan Ývaev málim etti, dep habarlaıdy QazAqparat.

Astananyń Qabanbaı batyr atyndaǵy kóshesinde asfaltty jóndeý jumystary ótkiziletindikten, sáýirdiń 20-nan bastap Dostyq jáne áýejaıǵa barar aınalma jolǵa deıińgi bólikte jol qozǵalysy shekteledi. «Atalmysh jol ýchaskesi bólik-bóligimen jóndeletin bolǵandyqtan, kólik qozalysy tolyǵymen toqtatylmaıdy», deıdi N. Ývaev. Degenmen joldyń ekinshi bóligin, aınalma joldan áýejaıǵa deıińgi bólikke keshendi jóndeý júrgizilýi múmkin. Ol kezde kóshe tutastaı jabylýy ǵajap emes. Ondaı jaǵdaıda qala turǵyndaryna áýejaıǵa deıin Qaraǵandy trassasy arqyly Ońtústik aınalma jol arqyly barýǵa týra keledi. Bul jaıttar aldyn ala Jol polıtsııasymen habarlanyp otyrady.

Sonymen qatar sáýirdiń 20-synda Aqjol kóshesi tolyǵymen jabylady. Atap aıtqanda onyń Lıteınaıa kóshesi men Pýshkın atyndaǵy kósheniń kóliktik qıylys bóliginde qozǵalys toqtaıdy.

N. Ývaevtiń aıtýynsha, atalmysh kósheniń jabylýyn Aqjol-Pýshkın jáne Aqjol-Bógenbaı bóliginde kárizdik júıelerdi júrgizý, sý jelilerin salý jáne joldyń osy bóligin 6 jolaqqa deıin keńeıtý boıynsha jumystar atqarylatyndyǵymen túsindiriledi. Sonymen qatar Aqjol kóshesiniń Lıteınaıa kóshesi men Aqjol-Bógenbaı kóshelerine deıingi bóliginde asfaltty qaıta jóndeý jumystary qatar ótetindikten, kósheniń atalmysh bóliginde jol qozǵalysy jartylaı shekteledi.