Astananyń bir ǵana dúkeninde merzimi ótken 35 ónim anyqtaldy
ASTANA. QazAqparat - Astananyń Saryarqa aýdanyndaǵy dúkenderdiń birinde jaramdylyq mezimi ótip ketken 35 azyq-túlik ónimi anyqtaldy, dep habarlaıdy QazAqparat Elorda Info saıtyna silteme jasap.
«Saryarqa aýdanynyń Qoǵamdyq densaýlyqty qorǵaý basqarmasynyń mamandarymen azyq-túlik ónimderiniń qaýipsizdigine monıtorıng júrgizý kezinde Esenberlın kóshesi, 38 úı meken-jaıynda ornalasqan «Suńqar» dúkeninde paıdalanýǵa jaramsyz 35 túrli ónim anyqtaldy. Ónimderdiń paıdalaný merziminiń ótip ketkenine 2 kúnnen 5 aıǵa deıin ýaqyt bolǵan», - delingen Astana qalalyq Qoǵamdyq densaýlyqty qorǵaý departamentiniń habarlamasynda.
Anyqtalǵan jaramsyz ónimderdiń qatarynda kúrish, dándi daqyldar, kondıter ónimderi (toqash, kakao-vaflı, kámpıt, sútti shokolad), nan ónimderi (qytyrlaq nan, toqashtar), sút ónimderi (sút, irimshik, irimshik deserti), et konservileri, soýstar, chıpsy, ketchýp jáne taǵy basqalary boldy.
Máselen, Italııada jasalǵan «Kinder Delice» bıskvıtti sútti toqashynyń daıyndalǵan merzimi 13.10.17 jyl, al paıdalaný merzimi 10.02.18 jylǵa deıin dep kórsetilgen.
«Monıtorıng kezinde tez buzylatyn jáne kremdi-kondıterlik ónimderdiń tiısti qujat pen markileýsiz jappaı satý faktisi anyqtaldy. Belgili bolǵandaı birqatar kondıterlik ónimderdiń qaýipsizdigin rastaıtyn jáne ruqsat qujattarynyń joqtyǵy belgili boldy. Osyǵan oraı, departament tutynýshylarǵa azyq-túlik ónimderin satyp alý kezinde onyń syrtynda kórsetilgen - daıyndalǵan kúni, jaramdylyq merzimi, saqtaý sharttary jáne taǵy basqasyn rastaıtyn málimettermen muqııat tanysýlaryn suraıdy», - delingen habarlamada.
Sondaı-aq vedomstvo qala dúkenderinde qandaı da bir merzimi ótip ketken ónimdi anyqtaǵan jaǵdaıǵa aýmaqtyq Qoǵamdyq densaýlyqty qorǵaý organdaryna habar berý qajettigin eskertedi.
