Astananyń bazarlary tolyǵymen qaıta qurylady
ASTANA. QazAqparat - «Saýda qyzmeti týraly» Zańǵa sáıkes, Astananyń barlyq bazarlary qaıta qurylady, dep habarlaıdy Elorda Info Baıqońyr aýdanynyń ákimi Erlan Qanalımovke silteme jasap.
Baıqońyr aýdanynyń ózinde 37 iri saýda úıi men bazarlar bar.
«Alash tasjolynyń boıyndaǵy konteınerler, jaıma bazarlardyń bári zamanaýı keıipke enedi, adamdar jabyq keshende saýda jasaıtyn bolady. Qazir Ortalyq bazardaǵy qaıta qurý jumystaryn bastadyq. Ondaǵy ekinshi jáne úshinshi pavılondar 2019 jyldyń sońyna deıin eldiń ıgiligine beriledi. Kezekte «Sharyn» bazary tur. «Shanhaı» degen atpen tanylǵan «Kókbazardy» qaıta qurý boıynsha keıbir máseleler bar. Jalpy, kóptegen ózgerister bolady», - dedi Qanalımov.
Saýda bazarlaryn jańǵyrtý jáne keńeıtý jumystaryn 2021 jylǵa qaraı aıaqtaý josparlanyp otyr. Astana turǵyndary azyq-túlik alý úshin qalanyń o shetinen bu shetine barmaýy úshin saýda oryndarynyń qoljetimdiligi máselesin sheshý boıynsha elorda ákimdigi taldaý júrgizdi.
«Kemi bes jańa bazar salý jobalaryn qarastyryp jatyrmyz. Sonyń birnesheýiniń - Beısekov kóshesindegi, temirjol vokzalynyń mańyndaǵy jańa bazarlardyń qurylysy bıyl bastalady», - degen bolatyn Áset Isekeshev aqpan aıyndaǵy esep berý kezdesýinde.
Sonymen qatar Astana ákimi saýda alańdarynyń ıelerine, eger olar bazardaǵy qaýipsizdik talaptaryna jaýap bermese, jabylatynyn eskertken.
