Astananyń basqa aýdandaryna qaraǵanda, jedel jərdem sol jaǵalaýǵa tez jetetin boldy
ASTANA. QazAqparat - Astana qalasynyń jedel jərdem qyzmetine tıesi kólikterdiń 54 paıyzy tozǵan. Taǵy 20 kólik únemi jóndeýdi qajet etip otyrady.
Bul týraly QazAqparat tilshisimen əńgimesinde Astana qalalyq jedel jərdem qyzmetiniń bas dərigeri Saparǵalı Dúısenov məlim etti.
"Búgin ashylǵan Ortalyq jedel medıtsınalyq jərdem stansasy bizdiń qyzmettiń sapasyn arttyrary anyq. Burynǵy ǵımaratymyz eski edi, sondyqtan, elordadaǵy jedel jərdem qyzmetkerleri bul ǵımarattyń ashylýyn qatty kútti. Mekeme sol jaǵalaýda ornalasqan, sondyqtan, sol jaǵalaýdaǵy shaqyrýlarǵa jedel baratyn boldyq",-deıdi S.Dúısenov.
Degenmen, QazAqparat tilshisi sol jaǵalaýǵa qaraǵanda, "eski" qalada 103 kóliginiń kóp keshigetinin aıtty. S.Dúısenov bul suraqqa qatysty kelesi ýəjin keltirdi.
"Durys aıtasyz. Sol jaǵalaý turǵyndaryna qaraǵanda, 103 nómirine eski qala turǵyndarynan shaqyrý eki ese kóp túsedi. Biraq, səıkesinshe, sol jaǵalaýmen salystyrǵanda, biz oń jaǵalaýǵa eki ese kóp kólik bólemiz. Kóshedegi keptelis bizdiń jumysty qıyndatyp tur. Qaladaǵy 14 jedel jərdem stansasynyń 10-y - osy oń jaǵalaýda ornalasqan",-deıdi S.Dúısenov.
Jalpy, qazir qalada 87 brıgada jumys isteıdi eken. 2017 jyldyń səýir aıynyń sońyna deıin qalalyq densaýlyq saqtaý basqarmasy jedel jərdem qyzmeti úshin sý jańa 30 kólik satyp almaq.
S.Dúısenovtiń aıtýynsha, qazir jedel jərdemge tıesili kólikterdiń 54 paıyzy tozǵan. Taǵy 20 kólik únemi jóndeýdi qajet etip otyrady.
Esterińizge sala keteıik, búgin Astanadaǵy jańa jedel jərdem ortalyǵyn asha otyryp, qala əkimi Əset Isekeshev kelesi jyldan bastap elordada jedel jərdem shaqyrýǵa jeti mınýt ta jetedi dep ýəde berdi.
