Astananyń bas jospary qaıta qaralyp, jyl sońyna deıin bekitiledi

ASTANA. QazAqparat – Elordanyń bas jospary qaıta qaralyp, oǵan ózgerister men tolyqtyrýlar engizilip jatyr. Bul týraly Premer-Mınıstrdiń orynbasary Altaı Kólginov málim etti, dep habarlaıdy QazAqparat tilshisi.

«Astanalyqtardy baspanamen qamtý ózekti. Jyl saıyn turǵyn úılerge degen suranys artyp keledi. Osy oraıda, Astananyń bas josparyna ózgerister engizýdi qolǵa aldyq, sebebi qoldanystaǵy jospar eskirdi. Qoldanystaǵy bas jospar boıynsha elorda halqy 2030 jyly 1 mln 200 myńǵa jetýi tıis edi. Al, biz ol kórsetkishke 2020 jyly jetip qoıdyq. Elorda halqy eki ese ósti, tıisinshe baspana men basqa da qajettilikter boıynsha suranys arta túsedi», - dedi Altaı Kólginov Úkimet úıiniń kýlýarynda tilshilerdiń suraǵyna jaýap bere turyp.

Úkimet basshysy orynbasarynyń dereginshe, jańartylǵan bas jospardy jyl sońyna deıin bekitý josparlanyp otyr.

«Astana qalasynyń alǵashqy bas jospary 2000 jyldardyń basynda qabyldandy, 2010 jyly oǵan túzetýler engizildi. Sodan beri ózgergen emes. Jańartylyp jatqan bas jospar 2035 jylǵa deıingi ýaqytty qamtıdy», - deıdi ol.

Buǵan deıin Altaı Kólginov elordada turǵyn úı qurylysynyń qarqynyn azaıtýǵa qatysty pikir bildirgen edi.